Vllaznia mposht Skënderbeun, shpallet kampione dimri
Fitore regjistruan edhe Tirana, Partizani e Farka
Me ndeshjet e djeshme të javës së 9-të, u mbyll edhe faza e parë e kampionatit kombëtar të volejbollit për meshkuj. Është skuadra e Vllaznisë ajo që shpallet kampione në këtë fazë të parë pas fitores me Skënderbeun. Shkodranët ndodhen në të njëjtën kuotë pikësh me Erzenin (22), por kanë një setavarazh më të mirë. Tirana dhe Partizani regjistruan fitore përballë Teutës dhe Studentit, ndërsa Farka triumfoi në transfertë 3-2 ndaj Elbasanit.
VLLAZNIA - Skënderbeu. Vllaznia e ka mbyllur fazën e parë me 8 fitore në kampionatin kombëtar. Shkodranët janë të pathyeshëm deri më tani, duke arritur që të marrin 8 fitore. Kuqeblutë në përballjen e fundit fituan 3-1 ndaj Skënderbeut në një ndeshje të luftuar dhe me shumë rivalitet, të luajtur në pallatin e sportit "Qazim Dervishi". Trajneri i Vllaznisë, Ermal Kraja, tha se skuadra e ka bërë detyrën dhe tashmë kërkon që këtë ekip dikush ta mbështesë për të shkuar te titulli kampion, pasi skuadrat e tjera do të bëjnë përforcime dhe një gjë të tillë duhet ta bëjë edhe Vllaznia.
TIRANA - Teuta. Bardheblutë
kryeqytetas bëjnë detyrën, duke marrë 3 pikët e radhës në kampionat në ndeshjen ndaj Teutës. Një takim që ishte thjesht një formalitet për skuadrën e Ilia Kojas, pasi u fitua pa asnjë problem. Tirana triumfoi 30, duke i fituar të tria setet thellësisht (25-11, 25-15, 2511). Ekipi bregdetar vijon ende të mos njohë asnjë set të fituar në këtë sezon.
PARTIZANI - Studenti. Derbi i kryeqytetit i buzëqeshi skuadrës së Partizanit, që mposhti me rezultatin e pastër 3-0 Studentin, në një sfidë ku nuk mungoi rivaliteti. Të kuqtë që në këtë takim drejtoheshin nga zëvendëstrajneri Elton Tukseferi, djersitën jo pak për të marrë 3 pikët. Ndeshja filloi me një luftë të lartë sportive nga të dyja ekipet, ku seti i
parë dhuron shumë emocione, pasi nevojiten pikët shtesë për të përcaktuar fituesin. Në fund të këtij seti, janë nënkampionët e Shqipërisë ata që tregohen më të saktë, duke fituar me shifrat 26- 24. Seti i dytë dhe i tretë kontrollohen pa shumë problem nga Partizani që i fiton me të njëjtin rezultat 2520, duke e mbyllur të gjithë takimin me fitoren 3-0.
ELBASANI- Farka. Elbasani mundet në shtëpi nga Farka Volej në volejboll për meshkuj, në një ndeshje me emocione dhe mjaft rivalitet. Elbasanasit e nisin mbarë ndeshjen, teksa shënojnë pikë
të vlefshme në fillim, por miqtë arrijnë të barazojnë me kalimin e minutave. Gjithsesi, seti i parë u fitua ngushtësisht nga elbasanasit 26- 24. Ndeshja është interesante dhe miqtë ia dalin të kundërpërgjigjen në setin e dytë, teksa e fitojnë 20-25. Elbasanit nuk po i shkon si duhet loja dhe janë sërish djemtë e Farka Volej që fitojnë setin e tretë, kësaj here në shifrat 16- 25. Vendësit kundërpërgjigjen në setin e katërt ku fitojnë 25-21 dhe e dërgojnë ndeshjen me set final. Në fund ia dalin të triumfojnë miqtë 12-15 dhe e fitojnë gjithë takimin 3-2.
V.Mema/S.Nikshiqi