Masllavica: Synojmë rekorde kombëtare dhe evidentimin e të rinjve për Botëror
Shtanga ka vendosur që të zgjedhë pikërisht Ditën e Flamurit për zhvillimin e Kampionatit Kombëtar të Peshëngritjes. Kështu, ditën e mërkurë, më 28 nëntor, në Pallatin e Sportit “Asllan Rusi” të kryeqytetit do të nisin dhe garat për vendosjen e rekordeve kombëtare të peshëngritjes. Këtë e bën të ditur vetë presidenti i Federatës Shqiptare të Peshëngritjes, Theodhori Masllavica, që sipas tij, dy janë synimet kryesore të këtij eventi kombëtar. Vendosja e rekordeve kombëtare si dhe përzgjedhja e elementëve të rinj, kryesisht nga U-17, për të nxjerrë një përfaqësuese, të Kombëtares U-20, e cila do të marrë pjesë në Botërorin e Pranverës, që do të zhvillohet më 1 prill. Për zhvillimin e këtij kampionati, që përkon i 71-ti, po merren të gjitha masat organizative për mbarëvajtjen si dhe realizimin e qëllimeve që ka kjo federatë lidhur me këtë sport. Siç dihet, në kampionatin e kaluar peshëngritësi më i mirë u shpall Briken Calja, duke u shpallur kampion kombëtar në peshën deri në 73 kilogramë, duke e mbyllur dygarëshin me 325 kilogramë (148 kilogramë në shkëputje dhe 177 kilogramë në shtytje). Presidenti Theodhor Masllavica për “Panorama Sport” u shpreh: “Ky event kombëtar është mjaft i rëndësishëm këtë sezon, sepse synohen dy qëllime kryesore: vendosjen e rekordeve të reja kombëtare, si dhe përzgjedhjen e të rinjve nën 17 vjeç, që do të përfaqësojnë Shqipërinë në Kampionatin Botëror të moshës U-20. Gjithashtu, federata jonë synon të organizojë edhe tri seminare, në bashkëpunim dhe me federatën botërore, lidhur me stërvitjen, arbitrimet dhe antidopingun. Ky bashkëpunim i ngushtë me federatën botërore do të bëjë të mundur që të vijë në Shqipëri një trajner gjeorgjian në muajin janar, për ta përgatitur më së miri ekipin tonë kombëtar për Europianin e marsit 2019. A.Dushku