Borusia fiton dhe kryeson e vetme Bundesligën

Ishte parashikuar një ndeshje e vështirë për skuadrën e Lusien Favres, e cila udhëtoi në Mainc për të ruajtur kreun e renditjes. Në fakt, skuadra e tij vuajti jo pak, duke fituar me vuajtje ndaj vendësve, të cilët arritën të barazonin për disa minuta ndeshjen. Pas një pjese të parë të barabartë, skuadra verdhezi gjeti rrugën e rrjetës në minutën e 64-t me anë të sulmuesit spanjoll, Pako Alkaser, i cili kishte hyrë në lojë vetëm disa minuta më parë për Mario Gëcen. Por, Mainc barazon rezultatin vetëm katër minuta më vonë me anë të Kuaison. Verdhezinjtë ashtu si ndaj Bajernit nuk u dorëzuan dhe shënuan sërish këtë herë me anë të mbrojtësit të krahut të djathtë, Luka Pizçek, në minutën e 76-të. Pjesa tjetër e ndeshjes u kontrollua më pas nga kryesuesit e Bundesligës, të cilët kaluan me sukses një test të vështirë. Borusia është skuadra e vetme në Gjermani që ende nuk ka pësuar asnjë humbje në këto 12 javë të kampionatit. Ata kryesojnë të vetëm me 30 pikë, duke u shkëputur shtatë pikë nga vendi i dytë që është Aintrahti i Frankfurtit dhe 9 pikë nga Bajerni që renditet i pesti. FAVRE, I LUMTUR PËR TRI PIKËT - Trajneri Lusien Favre ishte shumë i kënaqur pas ndeshjes, duke komentuar kështu fitoren me Maincin. "Kishim probleme me pasimin e fundit dhe nga mungoi precizoni, sidomos në pjesën e parë. Punuam shumë për të arritur te fitoja dhe kjo më gëzon. Mainc luajti një ndeshje të madhe edhe pse në fund fitimtarë dolëm ne", përfundoi trajneri zviceran i verdhezinjve.