Një Sherif nderon Teutën, Luftëtari në “tapet”
Nigeriani hap vendin për përforcime në të majtë gjatë janarit
Partizani u mundua që në merkaton e ja narit të afrojë lojtarët e duhur për të plotësuar nevojat e skuadrës në të gjitha repartet. Por, jo të gjitha prurjet dolën të "hairit" dhe dështimi më i madh ndodhi në fazën mbrojtëse. Njëri nga këta është mbrojtësi nigerian, Alma Uakili, i cili erdhi me pompozitet, por nuk arriti as të debutonte në ndeshje zyrtare, pasi nga e premtja ai nuk rezulton më pjesë e Partizanit. Klubi e priti gjatë 22-vjeçarin, por gjendja e tij e bënte të pamundur gatishmërinë për të dhënë kontributin në fushë. Nigeriani erdhi nga Shkëndija e Tetovës në merkaton e verës dhe shkaku që e lanë të lirë kampionët e Maqedonisë ishte se Uakili kishte probleme fizike. Në fillim te Partizani, mbrojtësi nuk kishte kondicionin e duhur, më pas pësoi një dëmtim në stërvitje, që e la gjithë kohës në tribuna. Duke parë që nuk kishte shpresa, klubi dhe përfaqësuesi i lojtarit janë ulur dhe kanë zgjidhur me mirëkuptim marrëveshjen dypalëshe. Alma Uakili, ndonëse nuk ka luajtur asnjë minutë, është paguar për kohën që ka qenë pjesë e "demave" dhe i është dhënë dora për të kërkuar fatin në ndonjë klub tjetër. Krahu i majtë i mbrojtjes së Partizanit duket se sjell ters për përforcimet që vijnë nga merkatot, pasi i fundit që ka mbijetuar është Renaldo Kalari. Për shkak se nuk kanë qëlluar në përforcimet në këtë sektor, të kuqtë janë detyruar që të improvizojnë Lorenc Trashin si mbrojtës të majtë.
MERKATO- Partizani i ka nisur spastrimet në javën para derbit, por ky proces është në hapat e para, pasi në vijim nuk përjashtohet mundësia që edhe ndonjë tjetër të ndjekë gjurmët e mbrojtësit Alma Uakili. Më të rrezikuarit janë ata që nuk kanë pasur hapësira apo që nuk u ka ardhur akoma koha të debutojnë, siç është rasti i mbrojtësit tjetër, Rron Statovci. "Panorama Sport" e ka njoftuar prej ditësh se në planet e klubit, përveç gjetjes së një bomberi, është edhe përforcimi i krahëve të mbrojtjes. Me largimin e Uakilit, automatikisht është hapur një vend për afrimin e një mbrojtësi të majtë. Ndonëse nuk bëhet publike, mësohet se drejtuesit e kanë nisur punën prej kohësh për gjetjen e përforcimet në merkaton e dimrit. Para disa ditësh, drejtori Olsi Rama pohoi se klubi ka skautët e tij në
Maqedoni dhe Kosovë, kështu që ky treg mbetet një mundësi për afrimet e reja. Gjithsesi, duhet pranuar se në verë nga ky treg erdhën lojtarë që nuk bindën dhe i pari sapo është larguar me kontribut zero, por me xhepin plot, nigeriani Alma Uakili.