Cuculi, i sinqertë: Ishte penallti

Ardian Cuculi tregohet i sinqertë, pranon që e preku topin me dorë. Qendërmbrojtësi i Kukësit, i cili në mungesë të Shametit mbajti edhe shiritin e kapitenit, gjatë intervistës së dhënë për emisionin "Gol pas Goli" të Vilma Mashës, deklaroi se arbitri gaboi.

Të pakalueshëm edhe me 3 mbrojtës...

Ishim të detyruar të ndërronim skemë prej dëmtimeve. Ky modul është shumë ofensiv dhe falë përkushtimit sot (dje) fitoi grupi.

Sa larg mund të shkojë ky Kukës deri në fund të 2018ës?

Është e vështirë, sepse nuk luajmë në shtëpinë tonë, por në këtë kampionat është dëshmuar se edhe i fundit mund të fitojë. Mund të kishim pak më shumë pikë, por në këto 4 ndeshje do kërkojmë të gjitha pikët.

E prekët topin me dorë në minutën e 27-të? Mendova se isha me duart shumë afër trupit, por ishte penallti. Duhet të jem i sinqertë, edhe pse arbitri gjykoi që nuk ishte. Edhe ai është njeri, por unë dua të jem i sinqertë. Partizani i 2014-ës apo ky Kukës është më i mirë? Ndoshta grupi ka qenë më i harmonizuar atëherë, por futbollistë cilësorë ka edhe tani. Në 2014-ën ka qenë kampionati në një nivel shumë të mirë. Çdo ekip që ishte për kampion, kishte lojtarë kombëtaresh. Kukësi, Partizani, Skënderbeu dhe Tirana. Plus edhe Laçi, që ishte shumë i fortë.

Dëshira më e madhe është të luani si qendër e majtë apo mbrojtës i majtë? Besoj se me eksperiencën që kam, më shumë i shërbej ekipit si mbrojtës qendre.