Luftëtari fut "ujë", gafa në fazën mbrojtëse

Pas dy rezultateve pozitive radhazi ndaj Flamurtarit dhe Tiranës, ekipi gjirokastrit u ndal në Durrës, duke humbur minimalisht 1-0 nga Teuta. Goli i pësuar që në start vulosi takimin në "Niko Dovana", aty ku të besuarit e Gentian Mezanit krijuan jo pak raste për të barazuar, por nuk ia dolën. Gjithsesi, në fund rëndësi kanë pikët dhe Luftëtari pësoi humbjen e nëntë këtë kampionat, diçka e papranueshme kur mendon se në fillim të sezonit ekipi u ndërtua me idenë për të kapur sërish Europën. Gafat me përzgjedhjen e stafit teknik që në fillim, më pas gabimet në merkato, dëmtimet e shpeshta, si dhe penalizimet e shumta me kartonë të lojtarëve, janë disa faktorë që kanë ndikuar jo pak në ecurinë e skuadrës. Megjithatë, me ardhjen e trajnerit Gentian

Mezani, skuadra gjeti ekuilibrat, duke marrë katër fitore dhe një barazim. Por, sigurisht 13 pikë në

14 ndeshje nuk mund të kënaqin drejtuesit. Nisur nga ndeshja e fundit në Durrës, mënyra e pësimit të golit risjell edhe një herë mungesën e përqendrimit të skuadrës në fazën mbrojtëse. Luftëtari vuan jo pak si ekip në aspektin difensiv dhe shembulli më konkret është goli i

Kallakut, ku askush nga lojtarët përpara mbrojtjes nuk mbulonte fantazistin e Teutës në momentin e goditjes. Deri më tani janë pësuar 16 gola, një shifër mjaft e lartë. Klubi pret shumë më tepër nga ky grup lojtarësh dhe në ndeshjen e radhës që gjirokastritët do të luajnë në shtëpi ndaj Kukësit, shpresohet që të riaftësohet edhe mesfushori i krahut, Balsa Radoviç. Trajneri Mezani pritet të ketë një grup të plotë dhe gjasat janë që këtë herë të marrë më shumë minuta edhe mesfushori AlbanoAleksi, i cili e ka lënë pas dëmtimin dhe është aktivizuar si zëvendësues së fundmi. Tomor Shehu