Zbardhet raporti, si Ramos injoroi mjekun
Kapiteni i Realit nuk iu bind urdhrave të përgjegjësit
Një tjetër kapitull në skandalin që ka përfshirë kapitenin e Realit të Madridit, Serxho Ramos, në shkeljen e rregullores gjatë kryerjes së kontrolleve antidoping. Këtë herë gazeta gjermane "Der Spiegel" ka shkuar më tej me një tjetër publikim. Këtë herë është raporti i mjekut përgjegjës për testin antidoping pas ndeshjes me Malagën, i cili nxjerr blof deklaratën e Ramosit. Mjeku që ishte përgjegjës për të bërë kontrollin e antidopingut të Ramosit ka mbajtur raport dhe ka përgënjeshtruar atë që tha kapiteni i Realit një ditë më parë pas humbjes me Eibarin. Ramos tha se personi që ishte përgjegjës e kishte lejuar që të bënte një dush.
Raporti- "Futbollisti Serxho Ramos më pyeti nëse mund të bënte një dush përpara se të kryente analizën e urinës, për faktin se ekipi ishte duke e pritur në autobus për rikthimin në Madrid. Unë i thashë se rregullorja e AEPSAD (Agjencia Spanjolle e Antidopingut) nuk e lejonte diçka të tillë dhe ai nuk mund të bënte dush. Por sportisti nuk u tregua korrekt dhe bashkë me mjekun e Realit të Madridit më thanë se në ndeshjet e UEFA-s, mjekët i lejojnë që të bëjnë dush dhe kjo gjë duhet të ndodhte edhe në La Liga. U përgjigjja që unë këtë gjë nuk e dija (që të lejojnë të bësh dush përpara testit të andidopingut në kampionat) dhe nëse kishte ndodhur, diçka që nuk e besoja, sërish unë nuk e lejoja. Lojtari nuk iu bind urdhrave të mia dhe u fut në dushin e sallës së kontrollit të stadiumit Malaga CF. Bëri dush në prezencën time. Por unë e informova që këtë gjë do ta reflektoja në dokumentin tim, i cili tha se nuk i interesonte", shkruhet në raportin e mjekut prezent për të kryer kontrollin e antidopingut të Serxho Ramosit.
Rregullorja- Në të njëjtin dokument që publikohet nga gazeta "Der Spiegel", tregohet edhe një herë tjetër rregullorja e kontrolleve të antidopingut, në të cilën thuhet se futbollistët nuk duhet të bëjnë dush dhe nuk duhet të lahen përpara një
kontrolli antidoping. "Në artikullin 77.2 të rregullores thuhet se në rastin kur një lojtar është i sinjalizuar për të bërë kontrollet antidoping duhet të shoqërohet nga mjeku përkatës dhe ky i fundit duhet ta ndalojë të shkojë në tualet, të lahet apo të urinojë", shkruhet në rregullore.