Arsenali s'ndalet, fiton dhe i bën presion Çelsit

Vuan me Bornmëthin, londinezët 1 pikë larg Champions-it

Një fitore me peshë për Arsenalin. Për arsyen se Bornmëthi në shtëpi kishte humbur vetëm një ndeshje dhe për faktin se është një nga skuadrat më të befasishme të kampionatit anglez. Pavarësisht humbjes, e bënë Arsenalin të vuante jo pak. Por, në fund "Topçinjtë" ia dolën të merrnin 3 pikët dhe të firmosnin rezultatin e 17-të radhazi pozitiv. Që do të thotë se pas dy humbjeve të para në kampionat, Arsenali nuk ka humbur më. Dhe për këtë fakt, ata janë në një zonë të rëndësishme të renditjes: vetëm 1 pikë larg vendit të katërt që mbahet nga Çelsi dhe do të luftojnë për një vend në Ligën e Kampioneve, i cili është objektivi kryesor i kampionatit. Në një kampionat ku në nivelet e larta luhet futboll i frikshëm (imagjinoni që Çelsi humbi për herë të parë pas kësaj jave dhe është -7 pikë nga vendi i parë), Emeri duhet të kënaqet me pak.

NDESHJA- Bornmëthi tregon gjithmonë se ka dëshirë të prodhojë lojë dhe të kontrollojë topin. Shënojnë që në minutën e shtatë të ndeshjes, por anulohet për shkak të një pozicioni jashtë loje të Bruks. Arsenali e ka të vështirë të kapë ritmin edhe pse në fakt i shkon shumë pranë golit me një goditje të Torreiras nga larg, i cili godet shtyllën. Si gjithmonë vendësit këmbëngulin, por për çudi e shohin veten në disavantazh. Janë të pafat, pasi Lerma shënon një autogol pas krosimit të Kolashinac. Bornmëthi ka besim dhe nuk dorëzohet duke shtuar ritmin. Dhe falë këmbënguljes gjen golin e barazimit me një kundërsulm, të cilin e finalizon në mënyrë të mrekullueshme King. Një barazim në frymën e fundit në pjesën e parë.

OBAMEJANG- Në pjesën e dytë janë zotët e shtëpisë që e nisin më mirë, por Arsenali në fund merr 3 pikët. "Topçinjtë" duan patjetër fitoren dhe fillojnë të luajnë më shpejt. Kjo gjë i jep frytet kur Kolashinac avancon mjaft mirë nga e majta dhe hedh një top në zonë. Obamejang e shtyn në rrjetë dhe nuk gabon nga ai pozicion. Mjafton ky gol që Arsenali të sigurojë fitoren. Edhe pse shënuan, sërish rrezikuan në fund kur Lerma godet shtyllën 5 minuta nga fundi i ndeshjes. Tani Arsenali e sheh veten vetëm 1 pikë nga zona Champions.