Lojtarët kundër Kovaçit, Benfika shansi i fundit

Nëse s'fiton nesër në Champions, shkarkohet

Niko Kovaç është më shumë i sh karkuar sesa trajner i Bajernit në këto orë të vështira për kampionët e Gjermanisë. Barazimi dramatik 3:3 kundër Fortuna Dyseldorfit në shtëpi të shtunën dhe mënyra sesi ky rezultat erdhi, me skuadrën që kryesonte fillimisht 2-0 dhe pastaj 3-1, e ka vendosur seriozisht në dyshim të ardhmen e kroatit në "Allianz Arena". I vetmi lojtar që u shpëtoi kritikave ishte Tomas Myler, me dopietën e tij të parë që prej muajit janar. "Sport Bild" zbulon se pas ndeshjes, shumë prej lojtarëve kanë ngritur zërin kundër trajnerit në dhomat e zhveshjes. Nëse nuk fiton ndeshjen e nesërme në Champions kundër Benfikës, ajo do të jetë e fundit për 47-vjeçarin në stolin e bavarezëve dhe kjo tashmë është e konfirmuar edhe prej presidentit Hënes, i cili nuk dha garanci nëse ish-trajneri i Frankfurtit do të ishte në pankinë edhe në ndeshjen e fundjavës në Bundesligë kundër Verder Bremenit. I pyetur nëse skuadra qëndron pas trajnerit pas kësaj ndeshjeje, Leon Gorecka dha këtë përgjigje: "Këtë nuk mund ta them". Por, kapiteni Manuel Nojer është nga ata që po lufton ende për trajnerin e tij: "Nëse do të kishim zbatuar atë që trajneri na kërkoi, atëherë do të kishim fituar 5-0". Në krah i ka dalë edhe David Alaba: "Kush e ka parë ndeshjen, e di që trajneri nuk ka aspak faj. Golat që pësuam, ishin shumë të hidhur. Nuk është ai fajtori". Pyetja që ngrihet është përse futbollistët nuk zbatojnë kërkesat e teknikut? Kovaç ishte shumë i zemëruar për këtë gjë. Në konferencën për shtyp pas ndeshjes, ai tha: "Ju nuk mund ta imagjinoni sesi ndihem unë brenda meje. Pashë edhe njëherë golat. Si gjithnjë, vijnë prej gabimeve individuale. Asnjë trajner në botë nuk mund t'i parandalojë ato". Mbështetje publike vjen edhe nga drejtori sportiv i Frankfurtit, Fredi Bobiç: "Asnjë trajner në botë nuk mund t'i shmangë golat që po pëson Bajerni. Nuk mendoj se problemi i tyre është vetëm Niko Kovaç". Në orën 18:59 trajneri la i heshtur stadiumin, i shoqëruar nga vëllai Robert, i ndërgjegjshëm se nëse nesër nuk fitohet ndeshja në shtëpi kundër portugezëve, atëherë ai pritet t'i japë lamtumirën stolit të Bajernit.