Spaleti: Nuk dyshoj te Barcelona
"Bëmë atë që duhet të bënim në Londër, do ishte më mirë që Borja të ishte titullar"
Dhjetë minuta nga fundi i ndeshjes në Londër, Interi ishte i kualifikuar në 1/8-at e Champions-it. Pastaj erdhi goli i Eriksenit dhe mbrëmja e Luçiano Spaletit përfundoi ashtu si 7 të mëparshmet në tokën ishullore, me humbje. Asgjë e pakorrigjueshme, por nëse "Spërsat" do të fitojnë në "Camp Nou", ndeshja e Interit kundër PSV- së në "San Siro" pas 14 ditësh mund të shndërrohet në të parëndësishme për kalimin e turit. "Bëmë atë që duhet të bënim", tha tekniku zikaltër. "Na vjen keq për rezultatin, por tani të qëndrojmë me kokën lart për ndeshjen e ardhshme dhe të shohim se çfarë ndodh. Golin e pësuam në momentin tonë më të mirë dhe më parë nuk kishim shfrytëzuar shumë mirë disa raste të mira. Kundër një skuadre si Totenhemi është normale që të hasësh momente vështirësie, je gjithnjë nën presion dhe te goli u gjendëm çuditërisht të papërgatitur".
NAINGOLAN "Problemi në kavilje u rishfaq dhe ai kishte probleme të vraponte mirë dhe po vuante. Kështu vendosa ta ndërroj. Do ishte më mirë të luante Borja Valero nga fillimi, por ne i bëmë të gjitha provat dhe Razha dukej në rregull. Sigurisht që nuk është e thënë se spanjolli do të bënte të njëjtën ndeshje po të kishte luajtur nga minuta e parë... Nuk u surprizova nga formacioni i Totenhemit me Eriksenin, Daierin dhe Sonin në stol".
FORCA BARÇA Katalanasait nuk humbasin në shtëpi në Champions prej 5.5 vitesh dhe Spaleti duhet të bëjë tifo për katalanasit pas 14 ditësh kur ata t'i vizitojë Totenhemi: "Nuk
kam asnjë dyshim për qasjen e Barcelonës në ndeshjen e fundit kundër Totenhemit. Në këto nivele nuk mund të mendosh keq. Pastaj ata kanë lojtarë si Mesi, Suarez... profesionistë të vërtetë".