Sherri, për Iskon ndërhyn Interi
Pakënaqësi dhe tension te Reali, zikaltrit mendojnë "goditjen" e madhe në merkato
Fitorja dhe kualifikimi si i parë i grupit nuk i ka qetësuar tensionet e shpërthyera te Reali i Madridit, për shkak të lënies në tribunë të mesfushorit Isko. Pakënaqësia e spanjollit nuk është një element për t'u neglizhuar dhe klubet më të mëdha europiane kanë nisur të planifikojnë ofensiva drejt Madridit. Mosha dhe cilësia e andaluzianit luajnë në favor të tij, me Interin dhe Juventusin që janë rreshtuar mes të interesuarve kryesore. Sigurisht nuk do të jetë e lehtë t'i rrëmbesh Florentino Perezit një nga yjet e skuadrës, por Bepe Marota në karrierën e tij ka treguar se me pak mbështetje, di t'u bëjë ballë edhe misioneve më të pamundura. Me kontratën që i skadon në 2022 dhe një vlerë rreth 100 milionë euro, fati i Iskos duket i shënuar, por merkato shpesh ka treguar se jo gjithmonë vendosin klubet mëmë.
PROBLEMI - Gjithçka nisi pasditen e të martës në Romë, kur Santiago Solari njoftoi formacionin që do të zbriste në fushë ndaj verdhekuqve. Isko e ka parë veten jashtë titullarëve, teksa në vend të tij është preferuar Jorente. 26vjeçari nuk ka pritur të ketë një bisedë me teknikun, por e ka shfaqur pakënaqësinë e tij në sy të të gjithë grupit. Tensioni ka shoqëruar ballafaqimin mes palëve, me Solarin që ka vendosur të dërgojë mesfushorin në tribunë, teksa me një deklaratë pas ndeshjes me Romën ka shpjeguar vendimin e tij: "Vendimet e mia janë thuajse gjithmonë sportive, por ka edhe raste të veçanta. Sidoqoftë, ai i Iskos nuk është i tillë".
KRISJA - Lenia jashtë formacionit,
për më tepër për një lojtar si Isko, që ka qenë një ndër pikat e forta të Realit, si me Zidanin e ashtu me Lopeteguin, ka rritur tensionin në dhomat e zhveshjes të "Los Blancos". Numri 22 madrilen ka luajtur vetëm 78 minuta me Realin e Solarit dhe, nga e gjithë skuadra, vetëm Jorente ka qëndruar
më pak në fushë. Ky fakt ka mbushur kupën e Iskos, por megjithatë raportohet se disa nga senatorët nuk e kanë pritur mirë reagimin e mesfushorit, aq më tepër tonin e përdorur, por nëse koha që shëron gjithçka nuk arrin të qetësojë Iskon, mund ta bëjë merkato dhe zgjidhjet që ajo ofron.