Skandal te Tomori, lojtari grushte trajnerit Devolli
Stërvitja kthehet në arenë boksi. Klubi: Pezullojmë lojtarin, Devolli ka besimin tonë
tërvitja e Tomorit degjeneron në grushte. “Panorama Sport” mësoi ekskluzivisht se një debat i ashpër mes mbrojtësit Lisjen Hadaj dhe trajnerit Bledar Devolli ka shkuar deri te konfrontimi fizik. Mësohet se krisjet kanë nisur që para ndeshjes me Lushnjën, kur lojtari ka kërkuar llogari se përse nuk u aktivizua. Kjo nuk i ka pëlqyer gjirokastritit, i cili ka vendosur pezullimin e lojtarit që prej së shtunës. Kur kishin kaluar 4 ditë asgjë nuk ishte harruar, përkundrazi.
SHERRI – Tomori kishte programuar që të kryente stërvitjen e djeshme në orën 14:00. Pa nisur mirë seanca, Bledar Devolli ka raportuar se futbollisti Hadaj duhet të linte fushën dhe të përcillej jashtë derës së stadiumit. Mirëpo, kjo gjë nuk i ka pëlqyer aspak futbollistit, i cili ka lëshuar një lumë ofezash në drejtim të trajnerit. Në krahun tjetër, as strategu i beratasve nuk është se ka kursyer në drejtim të futbollistit 24- vjeçar dhe gjithçka më pas ka degjeneruar në dhunë fizike. Të dy protagonistët kanë përdorur grushtet ndaj njëri- tjetrit, duke e kthyer seancën stërvitore futbollistike në arenë boksi. U desh ndërhyrja e pjesëtarëve të stafit teknik për të ndarë futbollistin dhe trajnerin, ndërkohë që lojtarët e tjerë ishin duke kryer nxehmjen.
ZANAFILLA – Teksa po luhej ndeshja Lushnja- Tomori, në minutën e 66-të Bledar Devolli ka lajmëruar futbollistin Andre Marchiori të bëhej gati për t’u futur në fushë në vendin e futbollistit Ariel Dobrës. Por, në këto çaste Lisien Hadaj nuk e ka pritur mirë këtë vendim, pasi priste ndoshta që të aktivizohej pikërisht ai, duke qenë se bashkë me italianin po kryenin nxehmjen. Mbrojtësi në kësi kushtesh
është rikthyer pranë stolit, por ka refuzuar që të ulej duke thënë: “Për çfarë e mbani këtë trajner? Është mirë ta largoni”. Kjo frazë e ka irrituar jashtë mase teknikun 40- vjeçar, i cili mori menjëherë vendim për ta pezulluar.
REAGIMI – Dy protagonistët e sherrit, Hadaj dhe Devolli kanë refuzuar të prononcohen. Megjithatë, klubi nuk ka qëndruar në heshtje pas këtij episodi të pakëndshëm. Të kontaktuar nga “Panorama Sport”, ata deklaruan: “Situata të tilla nuk na kanë hije dhe jemi të çuditur me këtë që ndodhi. Ne do të mblidhemi dhe do të shqyrtojmë sesi ndodhi debati në seancën stërvitore dhe kush janë fajtorët. Një gjë është e sigurt, që do të ketë masa
shumë të ashpra dhe nuk do të kursehemi ndaj këtyre episodeve”.
VENDIMI – Megjithatë, ky ishte vetëm reagimi i parë, pasi kur shënonte ora 17:00 e ditës së mërkurë, Tomori ka dalë me një njoftim në faqen zyrtare ku komunikonte vendimin për pezullim të lojtarit dhe i ofronin mbështetje të plotë trajnerit. “Menjëherë pas incidentit të ndodhur gjatë seancës së sotme stërvitore klubi ka vendosur: Pezullim pa afat për futbollistin Lisjen Hadaj. Ndërkohë, pas situatës së krijuar, duam t’i japim besimin maksimal teknikut Bledar Devolli dhe bashkë me stafin e tij dhe futbollistët të vazhdojnë punën dhe rikthimin te fitorja”, shkruhej në këtë deklaratë.