Fierakët me strategji tjetër, nuk ka deklarata bombastike

Qetësi “olimpike” dhe përgatitje normale e pa sforco e fierakëve, njësoj si përpara çdo ndeshjeje të radhës në kampionat. Seriozë dhe të impenjuar për t’u përballuar denjësisht edhe me Bylisin kryesues e për të dalë me rezultat pozitiv nga “Adush Muça”, fierakët janë shpërfillës ndaj deklarimeve pompoze të mallakastriotëve dhe kanë një qëndrim unison për atë që ballshiotët po thonë në media. “Avaz i njohur dhe ‘kronik’ i Bylisit: rrahin gjoksin përpara çdo takimi dhe ankohen për gjykimin pas ndeshjeve të dështuara!”. Rudin Nako është pjesë e “gardës” më korrekte të futbollit, jo vetëm në fushë, por edhe në deklarime. Respektues ndaj çdo kundërshtari, jo për kortezi e fasadë, por si etikë reale që ai bën për futbollin, bazuar në shprehjen e njohur “topi është i rrumbullakët!”. Nuk është marrë kurrë me çfarë thotë pala kundërshtare përpara ndeshjes së radhës, parim i tij, por preferon gjithmonë të flasë për atë që sheh dhe konstaton brenda “familjes” së tij futbollistike, skuadrës ku luan. “Së pari, dua të them që kurrë nuk jam marrë me ato që thotë kundërshtari. Çdo skuadër ka strategjinë e saj përpara një ‘ beteje’. Luajmë me Bylisin, skuadër shumë e mirë, vendi i parë në grupin tonë dhe bravo i qoftë! Por, le ta bëjmë ndeshjen në fushë, atje ku futbolli ‘flet’ siç duhet dhe më mirë se të gjitha deklarimet e parakohshme. Unë them se do të jetë një ndeshje e luftuar fort dhe të tri rezultatet janë të mundshme. Por, ajo që dua të theksoj me forcë dhe jo për lajm apo ‘balancim’ të kahut tjetër, është: nuk ka skuadër që na mposht në asnjë fushë, nëse luajmë si dy ndeshjet e fundit”, thotë Nako. Bujar Rama