Meta i jep titullin “Kalorësi i Urdhrit të Skënderbeut” shtangistit Calja
Peshëngritje/ Presidenti dekoroi dje kampionin e Europës
Presidenti i Republikës së Shqipërisë, Ilir Meta, vizitoi dje qytetin e Cërrikut, ku fillimisht u takua me kryetarin e Bashkisë Cërrik, Altin Toska. Kreu i shtetit iu bashkua administratës së bashkisë, ku me të gjithë punonjësit dhuruan gjak për fëmijët talasemikë të Lushnjës. Në një prononcim për mediat e pranishme, Meta e komentoi kështu iniciativën për të dhuruar gjak: "Jam shumë i kënaqur që marr pjesë në dhurimin e gjakut të punonjësve të Bashkisë Cërrik. Është një gjest shumë fisnik dhe human, që kjo bashki jep për fëmijët talasemikë të Lushnjës. I falënderoj të gjithë për këtë, sepse po bëjnë diçka shumë të mirë". Më pas, presidenti ka vizituar zyrën e kryetarit të bashkisë, Altin Toska, ku ka bërë një bisedë me të. I shoqëruar nga delegacioni i tij, presidenti udhëtoi edhe në fshatin e Shtërmenit, ku në ambientet e bar- restorant "Bashkim Belshi", është zhvilluar ceremonia e dekorimit të kampionit nga Shtërmeni, Briken Calja. Në këtë aktivitet zyrtar morën pjesë shumë figura dhe personalitete të ndryshme të sportit, ku i pranishëm ishte edhe kreu i Federatës Shqiptare të Peshëngritjes, Theodhor Masllavica. Presidenti i Republikës së Shqipërisë, Ilir Meta, dekoroi peshëngritësin Briken Calja me titullin "Kalorësi i Urdhrit të Skënderbeut". Presidenti Meta u shpreh kështu në lidhje me nderimin që iu bë kampionit të trefishtë të Europës: "Jam shumë i lumtur dhe tepër i kënaqur që sot (dje) i jap këtë titull kampionit të trefishtë të Europës, Briken Calja. Një titull më se i merituar nga ky sportist i kompletuar, që ka ngritur lart flamurin shqiptar. Ky është viti i Skënderbeut dhe Brikenit i shkon për shtat ky titull, pasi është krenaria e vendit tonë. Si ish- peshëngritës, jam i privilegjuar që dekoroj këtë sportist të madh. Ju falënderoj të gjithëve për pjesëmarrjen e madhe, duke e nderuar këtë peshëngritës me vlera". Më pas, fjalën e ka marrë dhe peshëngritësi shtërmenas Briken Calja, i cili ka qenë tepër i emocionuar. "Është kënaqësi për mua të marr këtë titull të madh. Nuk është pak për mua të vlerësohem nga presidenti i republikës, Ilir Meta, të cilin e falënderoj nga zemra, që më vlerësoi me titullin ' Kalorësi i Urdhrit të Skënderbeut'. Falënderoj familjen time që më ka mbështetur gjithmonë si dhe ekipin e peshëngritjes së Shtërmenit. Do vazhdoj të marr sa më shumë medalje për Shqipërinë dhe ta ngre sa më lart flamurin kuqezi", deklaroi Calja. Më pas u organizua një koktej për të gjithë të pranishmit. Presidenti i vendit gjithashtu zhvilloi një vizitë në palestrën e ekipit të Shtërmenit, ku takoi trajnerin Leonard Toska dhe të gjithë ekipin e Shtërmenit. Në fund, Meta provoi të ngrejë dhe një bosht bosh për të kujtuar me nostalgji vitet kur ishte peshëngritës. M.Miraka