Paulina Zizolli: Futbolliste prej babait, e nisa duke luajtur me djemtë
Për shumë qytete të vogla, të ashtuquajtura provinca, futbolli i femrave është një tabu, por ka dhe nga ato që e kanë thyer këtë tabu. Një shembull konkret është Maliqi, qyteza juglindore me afërsisht 7 mijë banorë, që ka bërë realitet ëndrrën e shumë vajzave pasionante që e dashurojnë futbollin, duke krijuar ekipin e femrave që merr pjesë në kampionatin kombëtar dhe ka në përbërje disa futbolliste cilësore, ku spikat Paulina Zizolli, që me 2 golat e saj i dhuroi fitoren historike skuadrës maliqare në transfertën ndaj Pogradecit. Në një intervistë për "Panorama Sport", Zizolli nuk e ka fshehur dëshirën për t'u transferuar jashtë vendit, teksa ka një këshillë për të gjitha vajzat që e duan futbollin. Si lindi dëshira për t'u bërë futbolliste? Babi im ka qenë ai që më ka bërë ta dua futbollin që e vogël. Çdo ndeshje që shikonte ai në TV, e shikoja dhe unë bashkë me të. Pastaj fillova që të luaja me djemtë e lagjes thuajse çdo pasdite dhe kështu nisi të më pëlqente akoma më shumë. Në atë kohë nuk e mendoja fare të bëhesha futbolliste, sepse ekipet e vajzave nuk ishin shumë të përhapura, sidomos në Shqipëri, por e kisha thjesht pasion. Ka qenë profesori aktual, Egli Malësija, ai që më informoi 4 vite më parë për hapjen e ekipit të vajzave dhe u bëra pjesë e Skënderbeut. E mbaj mend ditën e parë, ka qenë data 2 mars 2014. Po kaloni një moment shumë të mirë në aspektin personal te skuadra e Maliqit, si ndiheni?
Në këtë ekip kam mbështetjen e të gjitha shoqeve, të trajnerit si dhe të stafit. Kjo gjë më bën të ndihem shumë mirë, prandaj dhe mund të them se jam shumë e kënaqur që jam pjesë e ekipit të Maliqit.
Ku e shikon Paulina veten në një të ardhme?
Nuk është se e mendoj të ardhmen time në futboll, se siç e dimë të gjithë, futbolli i vajzave në Shqipëri lë shumë për të dëshiruar. Do doja shumë që të shkoja diku jashtë shtetit për të vazhduar karrierën, por që besoj është shumë e vështirë. Si fillim dua të përfundoj shkollën, pastaj gjërat e tjera t'ia lemë kohës. Kam qenë pjesë e Kombëtares U-19 për më shumë se 2 vjet, do më pëlqente që të përfaqësoja vendin tim në Kombëtaren A të vajzave.
Do ua këshillonit vajzave të tjera që t'i përkushtoheshin futbollit?
Për mendimin tim, nuk ka ilaç më të mirë për trupin, shëndetin, mendjen dhe gjithçka tjetër, veçse të merresh me sport. Prandaj, ua sugjeroj të gjitha vajzave. Futbolli i femrave është rritur ndjeshëm vitet e fundit dhe mundësitë janë të mëdha për të gjitha vajzat që kanë talent dhe e kanë me pasion. Ildi Merolli