Marota tërbon Juventusin, kërkon Dibalën tek Interi

Argjentinasi, i betuari ndaj ish-drejtuesit: Më merrni kudo që të shkoni

Ende nuk ka “debutuar” zyrtarisht si drejtues i Interit, megjithëse mungon vetëm dikush që ta thotë publikisht pasi firmat në kontratë, sipas raportimeve nga mediat italiane, janë hedhur me kohë: një njoftim pritet më 15 dhjetor me rastin e Inter-Udineze, pasi përpara janë sfidat kyçe të sezonit me Juven dhe PSV-në (të martën në 21:00) dhe “martesa” mund të kurorëzohet me dhuratë biletën e 1/8-ave të Champions-it. Menjëherë më pas, ish-administratori i deleguar bardhezi mund të nisë “luftën” me klubin që e shkarkoi. FUQI EKONOMIKE - “Sot Interi është shoqëria që i afrohet më shumë Juventusit ekonomikisht.

Diferenca mund të ngushtohet në harkun e 2-3 viteve: zikaltrit pritet të prekin kuotën 500 milionë euro si xhiro vjetore dhe bashkë me bardhezinjtë do jenë dy forcat financiare më të mëdha italiane”. Kështu Marko Belinaco, gazetar i “Sole 24 Ore” (e përditshme ekonomiko-financiare), e ka portretizuar krahasimin

jashtë fushe mes Interit e Juves. Pra, Marota mund të ketë shumë shpejt nëpër duar “armët” për të sfiduar ish-”Zonjën e tij” në merkato, ku objektivët e përbashkët janë shumë (Milinkoviç, Barela, Kieza…). “Bombën”, megjithatë, e ka lëshuar “Quotidiano Sport”: drejtuesi i ri interist do trokasë në dyert e Juves për… Paulo Dibalën. KUR AUZILIO... - I cili, duhet kujtuar, u kërkua gjatë nga Piero Auzilio (drejtori sportiv zikaltër) pranverën e 2015-ës, por Zamparini, në atë kohë president i Palermos, preferoi t’ia jepte Juves që ofronte më shumë. Talentit argjentinas i skadon kontrata në 2022-shin, e mbi të gjitha në momentin e largimit të Marotës numri 10 juventin i tha: “Më keni dhënë shumë, më merrni kudo që do shkoni”. Vështirë që bardhezinjtë të dorëzohen lehtë, por për të arritur tek ëndrra “Mbape” mund të duhet një sakrificë. Në krahun tjetër, “Joya” do ishte i lumtur t’u bashkohej argjentinasve të Interit.