Kryevepër e Alveshit, Flamurtari tërbon Laçin
Sherr në tunel dhe arbitrat maltezë që “pagëzohen” si... laçianë, ja çfarë nuk u pa
Flamurtari “tërbon” Laçin. Kryevepra e Danilo Alveshit ka mjaftuar për të marrë një fitore shprese për zonën “Euro”. Duke mposhtur një rival direkt, tashmë janë vetëm 1 pikë larg nga kurbinasit. Loja e ashpër, nervat dhe tensioni nuk munguan për 96 minuta lojë, por në fund festa ishte e gjitha për kuqezinjtë. Ky është i pari trepikësh që vlonjatët marrin pas dy vitesh përballë bardhezinjve. Këta të fundit u munduan që të reagonin, e megjithatë sa për meritë të Koliçit në dy raste, aq edhe prej gabimeve në finalizim, u larguan duarbosh nga Vlora.
PJESA E PARË - Loja nis e kujdesshme, por me Flamurtarin që sheh përpara. Kur futet e 3-ta minutë është Alvesh që jep shkëndijën e parë me një gjuajtje të rrezikshme me kokë, por topi kalon vetëm ngjitur me shtyllën. Minutat pasuese shoqërohen më shumë me raste moviolë sesa aksione për gol. Veç ndërhyrjeve të ashpra në të dyja kampet, në të 8-ën gjyqtari maltez, Glen Tona, u mohon një penallti të pastër vlonjatëve. Mersinaj tërheq nga fanella Bushiçin dhe pa u ruajtur fare, por arbitri çuditërisht vijon lojën. Vendësit nuk u besojnë syve, por mbledhin forcat dhe mundohen që të fitojnë terren. Në të 30-ën “zgjohet” Laçi. Xhixha i vjedh topin Siljanovskit në të majtën dhe, pasi hyn në zonë, pason për Jonuzin, por ky i fundit nuk gjen hapësirën dhe humbet një mundësi të mirë. Përgjigjen pas 5 minutash kuqezinjtë me Kalenë, por krosi i tij i rrezikshëm shkon drejt e në duart e Selmanit. Kur u krijua ideja që ky fraksion do të mbyllej pa gola, në të 42-ën Danilo Alvesh shtang miqtë. Një perlë e brazilianit nga 25 metra, pasi devijohet lehtë nga Gjoni, përfundon në trekëndëshin e portës së mbrojtur nga Selmani dhe çon vlonjatët në avantazh në dhomat e zhveshjes.
PJESA E DYTË - Migen Memelli e nis me ndryshime lojën, largon Berishën për Deliun dhe nuk kalojnë 5 minuta, ky i fundit rrezikon me një gjuajtje të menjëhershme në hyrje të zonës, por pa gjetur kuadratin. Kjo pjesë ka më shumë nerv dhe presing sesa e para dhe vlonjatët duken të papërmbajtshëm. Në të 54-ën është Kale që bën gjithçka mirë në mesfushë. Futet bukur në zonë e shmang portierin mik,
por vonohet dhe nuk gjuan siç duhet. Dy minuta më vonë, Alveshi mund të shënonte të dytin gol, por traversa i thotë “jo” roveshatës së tij fantastike. Mundohen kurbinasit me Mersinajn dhe Shtubinën në të 62-ën dhe 69-ën, por pa rezultat. Afro 10 minuta më vonë është Xhixha që rrezikon me një gjuajtje, por pas grushtimit të Koliçit, mendon Veliu që të spastrojë zonën. E 88-ta e shpëton për mrekulli portën e Flamurtarit. Jonuzi shërben për Altiparmakovskin, por gjuajtja e lehtë e tij kontrollohet nga Koliçi, pasi përplaset në shtyllë. E megjithatë portieri nuk e zotëron siç duhet topin dhe Xhixha mundohet që ta devijojë në rrjetë, por i shkakton faull. Akordohen 6 minuta shtesë dhe në të 92-ën Siljanovski provon me një goditje fluturimthi me të majtën, por topi përfundon vetëm jashtë. Në të 95-ën Laçi mund të gjente golin e barazimit, por e djathta e Jonuzit nuk ka shënjestër. Sekondat e fundit prodhojnë edhe tension mes lojtarëve, e megjithatë asgjë nuk ndryshon.