Bejl, gol pas 99 ditësh, Reali mposht Hueskan
Uellsiani zhbllokohet në Alkoraz, por Hueska i kërcënon
Debutim historik i Realit të Madridit në Alkoraz të Hueskës, ku arrin një fitore të vuajtur dhe shumë të rëndësishme: skuadra e Solarit mbërrin në -2 pikë nga Sevija dhe Atletiko e Madridit dhe mbetet - 5 nga Barça kryesuese. Vendimtar goli i Bejlit në fillim të ndeshjes. Hueska mbetet e fundit dhe ende pa fitore në shtëpi.
ISKO DHE ASENSIO JASHTË – Solari uli në stol përsëri Iskon (kurrë titullar me të në kampionat) dhe Asension, duke i hapur vend Markos Alonsos në vend të të dëmtuarit Kasemiro dhe Sebajosit për Krosin. Titullar edhe Lukas Vazkez, me Benzemanë dhe Bejlin që gjetën menjëherë golin. Në minutën e tetë, Jorente hap për Odriozolën, i aktivizuar në krahun e tij të djathtë, me Karvahalin që zëvendësonte Marselon në korsinë tjetër, përgjumje e Marimon dhe e majta fluturimthi e uellsianit, që sjell golin e katërt në këtë kampionat, por të parin në thuajse 100 ditë. Në La Liga nuk shënonte prej 1 shtatorit.
HUESKA, E RREZIKSHME – Dukej si preludi i një
goleade, por në të vërtetë Reali i fik shpejt motorët me Hueskën që mori dalëngadalë kurajë, madje goditi edhe shtyllën. Kurtua ndali Avilan, Jovanoviç Bejlin dhe në fillim të pjesës së dytë vendësit iu afruan shumë pranë barazimit: Melero shpërdoroi një gol të
sigurt me kokë dhe më pas Kurtua i tha “jo” Ferreiros.
VUAN SOLARI – Tekniku argjentinas aktivizon Valverden për Sebajos, pastaj hyjnë Isko dhe Asensio për Modriç dhe Bejl, por Reali në pjesën e dytë pati vetëm një rast, me uellsianin e ndalur
përsëri nga portieri serb. Hueska provon deri në fund, por “Cucho” Hernandez shpërdoroi përsëri dhe kampionët e Europës vuajtën deri në minutën e fundit, duke u trembur edhe njëherë, me Karvahalin që shpëtoi mbi vijë fatale goditjen e Riveras.