Kaos total te Luftëtari, presidenti premtoi zgjidhje për dy ditë

Gentjan Mezani, trajneri i Luftëtarit, pranoi publikisht se situata e vështirë financiare ka qenë që prej periudhës kur ai ka marrë drejtimin e bluzinjve. E ndërsa flitet shumë, duket qartësisht se bëhet fjalë për një situatë kaotike. Së pari, ishte vetë deklarata publike e presidentit Tavo, i cili premtoi se brenda dy ditësh do të gjendej zgjidhja për gjithçka. Ai pranoi vonesat e pagave dhe dha afat prej 48 orësh për likuidimin, por në fakt nuk është bërë asgjë. Premtimi u shkel dhe situata është rënduar më tepër. Së dyti, mësohet nga burime konfidenciale se në Gjirokastër situata e vështirë ka bërë që të projektohet një plan për të mbajtur një pjesë të skuadrës, e cila do të konsiderohet më cilësorja dhe për të tjerët që kanë edhe çështje financiare të palikuiduara, t'u propozohet largimi pa marrë asnjë të ardhur të prapambetur. Së treti, gazeta ka mësuar se nga Luftëtari është larguar edhe zëvendëstrajneri italian, Paskualeti, të cilit i janë vonuar biletat e udhëtimit për bashkëshorten e sëmurë. Një sezon më parë, Luftëtari ishte shembull, pasi në fushë prodhonte lojë spektakolare, arriti objektiva për të kapur Europën, më tej largoi disa futbollistë cilësorë. Me largimin e trajnerit Hasan Lika, që arriti Europën, situata u vështirësua për shkak të zgjedhjeve totalisht të gabuara të drejtuesve. Deri më tani gjithçka është në kuadrin e premtimeve që problemet do të gjejnë zgjidhje, ama situata në klasifikim është rënduar së tepërmi. E nëse nuk reagohet shpejt, merkatoja e janarit do ta gjejë të papërgatitur skuadrën që nuk do të mbajë dot titullarët e për pasojë mbijetesa do të vështirësohej.