Kastrioti u pret biletën tre afrikanëve, hapen vendet për merkaton e janarit
Shkon në pesë numri i largimeve nga ekipi krutan
Kastrioti u mund nga Tirana të shtunën dhe zbriti sërish në pozitën e fundit në klasifikim, pasi Kamza fitoi ndaj Luftëtarit dhe bëri sërish rokadë pozicionesh me krutanët. Dita e djeshme ka qenë ditë pushimi, ndërsa sot, Kastrioti do të nisë përgatitjet për sfidën e radhës, të cilën do ta luajnë në “Redi Maloku” ndaj Teutës.
LARGIMET - Krutanët gjatë merkatos së verës afruan në skuadër shumë lojtarë të huaj, mes tyre edhe tre futbollistë nga Kameruni, të cilët asokohe, kur skuadra drejtohej nga Elvis Plori, cilësoheshin si sportistë tejet të rëndësishëm
e që në të ardhmen do t’i bënin punë skuadrës. Mirëpo, ata nuk arritën të përshtateshin dot me ekipin dhe që atëherë minutat e marra prej tyre ishin 0, me përjashtim të njërit prej tyre. Tabort Preston u grumbullua disa herë në 18-she, por minutat e marra
prej tij në total ishin vetëm 63 dhe në të gjitha ndeshjet ishte aktivizuar si zëvendësues. Edhe me ardhjen e teknikut Stavri Nica, i cili solli revolucion në skuadër, asnjëri prej tyre sërish nuk e bindi 64vjeçarin dhe sërish nuk ishin në planet e teknikut. Të shtunën, tre
kamerunasit, pasi biseduan me detaje me drejtuesit, arritën të mbyllnin me marrëveshje bashkëpunimin. Dhe me miratimin e të dyja palëve vendosën që të shkëpusnin marrëdhëniet përfundimtare me klubin, duke marrë me vete edhe lejekalimet. PLANET PËR MERKATON...
Me largimin e tre kamerunasve, krutanët aktualisht kanë 5 (pesë) vende vakante. Përpara kamerunasve, nga skuadra po me konsensus janë larguar edhe Rrahim dhe Galego. Kjo do të thotë që në merkaton e janarit Nica do të ketë mundësi të afrojë të paktën 5 lojtarë, ose më shumë, pasi nuk përjashtohet mundësia që të ketë edhe të tjera largime. Megjithatë, pavarësisht këtyre largimeve, tekniku vijon të jetë i qetë, pasi lojtarët që ka grumbulluar në ndeshjet e fundit i ka të gjithë në dispozicion. Bujar Balliu