Kaçe-Llullaku, dy “zile” Panuçit
Mesfushori shtatshkurtër realizon me kokë, Llullaku hakërrehet kundër trajnerit
Ergys Kaçe dhe Az dren Llullaku i çojnë dy “zile” Kristian Panuçit. Ata që në vitin e parë të trajnerit italian u “harruan” dhe nuk patën një rol protagonisti, po shkëlqejnë në kampionatet e tyre. Ditën e djeshme shënuan dhe i dhanë një mesazh të qartë trajnerit të Kombëtares, që t’i ketë në axhendë dhe t’i ndjekë për sfidat e ardhshme dhe eliminatoret e Kampionatit Europian.
Shkëlqen Kaçe- Po Shqipëria mos ka në mesfushë Ksavin dhe Iniestën që nuk aktivizohet Ergys Kaçe? Kjo ishte shprehja e famshme që qarkulloi disa vite më parë me autor presidentin e PAOK-ut. Nuk u vërtetua kurrë nëse ishte thënë realisht, por ka një të vërtetë të madhe brenda saj. Është e pashpjegueshme sesi një mesfushor me cilësi dhe me tipare si Ergys Kaçe ende nuk është një pikë e palëvizshme në formacionin e Kombëtares shqiptare. Me Panathinaikosin po jeton një nga momentet më të mira të karrierës, teksa ditën e djeshme arriti të shënonte gol në ndeshjen kundër OFI Kretë (skuadra e tij humbi 3-1). Si për çudi gjeti rrjetën me kokë, duke u treguar shumë i zgjuar në ndjekjen e një aksioni premtues. Kaçe mori një krosim të mirë nga e majta dhe e devijoi në brendësi të zonës, duke e dërguar në rrjetë. Ky ishte goli i dytë në këtë sezon të kampionatit grek për Kaçen, i cili disa javë më parë realizoi një perlë në derbin kundër Olimpiakosit. Megjithatë, ai vazhdon të jetë ende një futbollist në hije kur bëhet fjalë për Kombëtaren dhe trajneri Kristian Panuçi e grumbulloi në dy ndeshjet e fundit vetëm se Loret Sadiku refuzoi ftesën e tij. Luajti si titullar me Skocinë, por u zëvendësua kur Mavraj mori karton të kuq. Ndoshta, në edicionin e ardhshëm të eliminatoreve mund të jetë një lojtar i rëndësishëm për formacionin kuqezi.
Llullaku s’fal- I kanë mjaftuar vetëm 10 minuta nga futja në fushën e lojës për të lënë gjurmë dhe për të konfirmuar se është një lojtar i pazëvendësueshëm për formacionin e rumunëve të Astras. Azdren Llullaku ka gjetur golin në fitoren 3-1 të këtyre të fundit ndaj Konkordias. Trajneri nuk i kishte besuar një
fanellë titullari, por Llullaku u fut në fushën e lojës në minutën e 77-të dhe në të 88ën përfiton nga një top i kthyer në zonë për ta dërguar në rrjetë. Madje nuk feston, por sheh i tërbuar nga stoli kundër trajnerit Ky ishte goli i katërt për Llullakun në kampionat, por ai e ka humbur besimin e trajnerit Panuçi dhe nuk është grumbulluar në ndeshjet e fundit.