Milani humb shansin, por mbetet në Champions
Xhixho të tjera mrekulli, Higuain e Kutrone shpërdorojnë
Mes Milanit dhe Torinos janë parë ndeshje shumë herë më të bukura, por dje skuadrat nuk i vunë stërkëmbësin njëra- tjetrës. Kuqezinjtë mbeten në vendin e katërt me Interin që është vetëm një fitore larg, ndërsa "Demat" konfirmohen një pengesë e vështirë, sa herë luajnë në transfertë, me Europën që mbetet një objektiv i arritshëm për të besuarit e Valter Maxarrit.
ÇFARË XHIXHO - Pjesa e parë nuk rezulton vendimtare, por jep sinjale të qarta. Torino konfirmon ecurinë e mirë në kampionat, teksa Bazeli me shokët përpiqen të shfrytëzojnë superioritetin numerik në mesin e fushës, duke hapur më pas lojën në krahë ku Ansaldi dukshëm është superior ndaj Kalabrias. Jo rastësisht, sulmet mike janë më të rrezikshme në korsinë e majtë, por "Djalli" ka një engjëll mbrojtës si Donaruma, i cili ndal në mënyrë të mrekullueshme Falken në minutat e para të takimit. Edhe Beloti rrezikon në dy raste, por goditjet e tij përfundojnë respektivisht mbi traversë dhe në fundore ( devijim vendimtar i Xhixhos). Gatuzo nuk e modifikon 4- 4- 2- shin e tij, me Suson që nuk është ai i zakonshmi, ndërsa Higuain dukshëm luan nën trysni, pasi kur duhet të godasë, pason dhe kur mund të shënjestrojë portën, bën altruistin për Suson. Goditja e parë në kuadrat për kuqezinjtë vjen nga Kutrone, por Sirigu është në lartësinë e situatës, në një ndeshje ku portierët bëjnë më mirë se bomberët.
PENGU KUTRONE - Me ekipet që ofrojnë një përballje pa shumë emocion, janë trajnerët që mundohen të modifikojnë ecurinë e ndeshjes. Gatuzo bën vetëm një ndërrim, duke larguar Çalhangolunë për Kastijehon, ndërsa homologu Maxarri i shfrytëzon të gjitha "kartat" e tij. Spanjolli kuqezi mundohet të japë një kontribut në rezultat, duke i shkuar pranë golit, por pa sukses. I njëjti fat për Zazën që hyn në lojë në vend të Falkes. Minutat e fundit dhurojnë edhe rastet më të mira me Higuain që ndalet nga Xhixhi, ndërsa Kutrone shpërdoron një top të artë të Bakajokos, duke mos shënjestruar as portën. Me ekipet që ndajnë nga një pikë për t'u nënvijëzuar përjashtimi i radhës për Maxarrin, ndërsa Gatuzo largohet vetë, me kokën ulur, pas një shansi të artë për t'iu afruar majave edhe më të larta të renditjes. Vendi i katërt është i vetmi ngushëllim, për momentin...