Zbarkon Paketa: Ditë e veçantë, zgjodha Milanin për historinë

Dje në "San Siro" për të ndjekur skuadrën, sot e presin vizitat mjekësore

Lukas Paketa u nis nga Brazili ditën e shtunë dhe pas 14 orësh udhëtimi, më në fund mbërriti në Milano dje në ora 11:08. Zbarkimi i tij në aeroportin e Malpensas u gjallërua nga një mori tifozësh dhe gazetarësh, megjithatë pas një nate në fluturim dhe thuajse pa gjumë, braziliani i dribloi të gjithë ata që e prisnin me një fjali. "Zgjodha Milanin për historinë", ishte gjithçka tha 21-vjeçari për të cilin kuqezinjtë do të derdhin 35 milionë euro në arkat e Flamengos. Sulmuesi u prit nga një delegacion kuqezi, në të cilin nuk bënin pjesë Leonardo dhe Maldini, por sidoqoftë ai nuk ishte

vetëm. Paketa kishte ardhur me prindërit dhe bashkëshorten, teksa përpara se të drekonte me drejtuesit e "Djallit", ai u akomodua në një hotel në qendër të Milanos për të pushuar pak pas gjithë atij udhëtimi të gjatë. AXHENDA - Fjalëpak, por shumë i buzëqeshur Paketa në

ditën e tij të parë në qytetin ku do të hedhë hapat e para të karrierës së tij europiane. Në orët e para të pasdites, braziliani u takua me Maldinin dhe Leonardon. Pikërisht ky i fundit ishte vendimtar në zgjedhjen e djaloshit dhe ecurinë e bisedimeve për transferimin e tij. Kontaktin e parë më shokët e rinj të ekipit e pati në ambientet e stadiumit "San Siro", teksa nga tribuna vërejti për herë të parë skemat në të cilat duhet të integrohet dhe tifozërinë, e cila mezi pret ta brohorasë. Prania e tij nuk rezultoi fatsjellëse me Milanin, që mori vetëm një barazim ndaj Torinos. Pas ndeshjes së djeshme, sulmuesi 181 centimetra i gjatë u rikthye në hotel. Sot do të jetë një tjetër ditë e veçantë për të, pasi do të vizitojë qendrën stërvitore të "Milanello"-s ku do të kryejë edhe disa teste atletike.

HERA E PARË - Paketa do të qëndrojë në Milano deri të premten e më pas do të kthehet në Brazil, ku do të qëndrojë rreth dhjetë ditë. Ai do të prezantohet zyrtarisht më 2 ose 3 janar, datë në të cilën do të jetë në dispozicion të trajnerit Xhenaro Gatuzo. Teorikisht, 21vjeçari i ardhur nga Flamengo mund të debutojë me fanellën e Milanit më 16 janar në Xheda, Arabi Saudite, ku kuqezinjtë do të luajnë finalen e Superkupës së Italisë ndaj Juventusit. Për momentin, kënaqësinë e tij e ka ndarë në rrjetet sociale, si zakonisht, kur dje në mbrëmje shkruante: "Një ditë e veçantë".