“E njoh mirë De Jongun, jam drejtori më punëtor”

Hasan Salihamixhiç e shikon veten e tij të keqgjykuar në rolin e tij si drejtor sportiv i Bajernit të Mynihut dhe mbrohet në këtë mënyrë gjatë një interviste për “Welt am Sonntag”: “Në punën time të deritanishme unë ndoshta kam lëvizur më shumë sesa gjithë paraardhësit e mi gjatë gjithë kohës së tyre te Bajerni”. Shigjeta e boshnjakut i drejtohet paraardhësit të tij, Matias Zamer, i cili dha dorëheqjen për arsye shëndetësore nga detyra e tij në prill 2016, ndërkohë që përpara 51-vjeçarit, postin e drejtorit sportiv e mbulonte Kristian Nerlinger (deri në 2012). Salihamixhiç e mori detyrën e tij në 31 korrik 2017, pas skarcimit të kandidaturave të Filip Lahmit dhe Maks Eberlit. “Brazzo” e përjashtoi mundësinë që ai të katapultohej si numri dy i klubit, në vend të Rumeniges, por e mirëpriti një bashkëpunim me Oliver Kahnin, ish-kapitenin e klubit. Ai shtoi gjithashtu se nuk e këmben rolin e tij dhe theksoi se autoriteti i tij brenda klubit nuk është vënë në diskutim, madje edhe nëse i duhet të dalë kundër shefave të tij, ai e bën pa hezitim: “Të gjithë në klub e dinë që unë nuk dhuroj asgjë dhe nuk bëj kompromis me fitoren”. Ndërkohë që në lidhje me përgjegjësitë e tij, 41-vjeçari tha se ai jo vetëm kujdeset për lojtarët profesionistë, por merret gjithashtu me politikën e zhvillimit të akademisë, sistemit të skautingut, edukimin e të rinjve, deri te mjekët, fizioterapistët dhe analiza e videove. Në fund, krenohet edhe me vendimin e tij për të punësuar Miroslav Klosen në rolin e trajnerit U17, për të cilin thotë fjalët më të mira.

MERKATO – Pas fitores 3-0 ndaj Nurembergut, Salihamixhiç, ripërsëriti se skuadra do të përforcohet në janar. “Kemi disa plane dhe do përpiqemi të bëjmë diçka. Do shohim nëse diçka është e mundur. Është gjithnjë e vështirë në janar”. Ai komentoi edhe Frenki de Jongun, një nga emrat që gjermanët janë të interesuar, për të cilin interesohet edhe PSG-ja. “Është një lojtar i mirë pa dyshim. Me të Parisi do të forcohej akoma më shumë”, tha për mesfushorin 21vjeçar të Ajaksit. “E njoh prej shumë kohësh. Është përmirësuar shumë. Ai luan edhe në kombëtaren holandeze përveç Ajaksit”. “Brazzo” do të ketë shansin ta ndjekë edhe një herë nga pranë talentin ditën e mërkurën, në ndeshjen e fundit në grup me Amsterdam. Do jetë një mundësi për të diskutuar edhe për këtë temë.