Luftëtari, portieri: Dua të iki
Ramadani dhe Rroca kanë dërguar shkresë për pagat, por në fund vendos klubi bluzi
TOMOR SHEHU
Pasi bëri një “lëmsh” të vërtetë në verë me portierët, klubi i Luftëtarit iu fal përsëri elbasanasit Shkëlzen Ruçi, i cili ka luajtur si titullar në të gjitha ndeshjet e deritanishme në kampionat, duke qenë më i aktivizuari me fanellën bluzi. Mirëpo, prej një muaji ai rezulton të ketë kërkuar zyrtarisht largimin nga Luftëtari. Situata kaotike në klubin bluzi ka bërë që shumë lojtarë të humbasin besimin për vazhdimësinë, por gjithsesi vetë Ruçi deklaron për “Panorama Sport” se largimin nga Luftëtari e ka kërkuar për arsye familjare. “Më datën 12 nëntor kam paraqitur një kërkesë në zyrat e FSHF-së në rrugë postare dhe sot (dje) u bë një muaj. Mbërritja me vonesë gati 5-6 ditë e shkresës bën që të mbetem në pritje të marrjes së përgjigjes vendimtare për të ardhmen time. Unë aktualisht nuk jam lojtar i lirë, por mund të them se vetëm para ndeshjes së fundit për këtë vit kundër Partizanit do të mësoj gjithçka për kërkesën që i kam drejtuar Federatës. Me drejtuesit do të ulem të bisedoj, me qëllim krijimin e mundësisë së largimit nga Luftëtari për arsye familjare”, deklaroi dje 26-vjeçari, i cili luan sezonin e tij të tretë te Luftëtari. Ndërkohë, gazeta mëson se një kërkesë që lidhet me anën financiare dhe afatet ligjore për respektimin e kontratës kanë bërë në klub edhe kapiteni Behar Ramadani dhe fantazisti Eduard Rroca. Gjithsesi, për të ardhmen e tyre do të vendosë klubi, pasi është në vullnetin e këtij të fundit për të respektuar ose jo marrëveshjet. Të dy lojtarët janë nën kontratë, por do të ulen të bisedojnë me
drejtuesit në fund të muajit.
GAFAT E KLUBIT
Ish-stafi teknik i Luftëtarit dhe natyrisht ata që u morën ekskluzivisht me merkaton, që më pas u shkarkuan të gjithë, bënë një gafë trashanike sa u përket përzgjedhjeve për portën. Fillimisht afruan kroatin Hrvoje Bukovski, i cili luajti në dy takimet e Ligës së Europës kundër Ventspils, e më pas prishi kontratën me mirëkuptim, duke i shkaktuar një faturë prej 10 mijë eurosh klubit. Një histori gati qesharake ishte ajo me Ilias Melkas, i cili firmosi për Luftëtarin dhe pas pak ditësh stërvitjeje u “zhduk”. Portieri erdhi i dëmtuar në Gjirokastër, mirëpo klubi nuk arriti ta kuptonte këtë përpara se të firmoste. Në këto kushte porta e bluzinjve mbeti në dorë të Ruçit dhe të riut Shumeli. Në janar klubi do të futet sërish në merkato, duke afruar një portier për pjesën e dytë të sezonit.