Prapaskenat, të hënën merr formë Liga Profesioniste
Do votohet krijimi i Ligës Profesioniste me statut dhe kryesi të përkohshme
Gjithçka është gati, nga java e ardhshme do të nisë Liga Profesioniste. Një premtim i kahershëm duket se po fillon të marrë udhë dhe futbolli shqiptar do të hapë një kapitull të ri. “Panorama Sport” ka mësuar se nga e hëna do të ketë një mbledhje ku edhe do të nisin themelet ...
Gjithçka është gati, nga java e ardhs hme do të nisë Liga Profesioniste. Një premtim i kahershëm duket se po fillon të marrë udhë dhe futbolli shqiptar do të hapë një kapitull të ri. “Panorama Sport” ka mësuar se nga e hëna do të ketë një mbledhje ku edhe do të nisin themelet e Ligës Profesioniste në vendin tonë. Struktura, statuti, organizmi drejtues dhe gjithçka nevojitet për të hedhur hapin e parë të ekzistencës së saj do të diskutohen dhe materializohen më 17 dhjetor të këtij viti.
MBLEDHJA
Puna për krijimin e Ligës Profesioniste ka nisur prej kohësh. Drejtues të lartë në FSHF kanë bërë prej kohësh ndërlidhjen mes institucionit që kontrollon garën në vend dhe skuadrave pjesëmarrëse në Kategorinë Superiore. Gazeta ka mësuar se gjithçka është gati tanimë dhe me miratimin e të dhjetë skuadrave të elitës momentalisht, do të organizohet mbledhja e parë që pritet të formalizojë krijimin e Ligës Profesioniste. Teksa prej javësh është duke u punuar rreth saj, mësohet se është gjendur dakordësia unanime për materialet që do të bëjnë gati edhe nisjen e kësaj strukture të re në futbollin shqiptar. Të hënën, në ambientet e FSHF-së, pritet që drejtuesit e lartë të dhjetë klubeve të jenë të pranishëm në mbledhjen që do të themelojë edhe Ligën Profesioniste të futbollit shqiptar.
DAKORDËSIA
Gazeta gjithashtu ka mësuar se statuti i Ligës ka qenë një nga ngërçet që ka vonuar deri më tani krijimin e Ligës. Teksa është bërë edhe propozimi bazë i FSHF-së, më tej ka pasur disa ndryshime të ardhura si pasojë e konsultës me klubet. Paraprakisht, bëhet me dije se të dhjetë skuadrat e Superiores kanë gjetur akordin unanim për çfarë pritet të votohet të hënën për dokumentin themeltar, mbi të cilin do të funksionojë Liga, statutin.
KRYETARI
Në këtë mbledhje pritet që të votohet edhe për kryetarin që do të drejtojë Ligën Profesioniste. Në çdo hap të deritanishëm, zëvendës-presidenti i FSHF-së, Edvin Libohova, ka qenë i ngarkuar për konsultat me klubet dhe nuk përjashtohet mundësia që të jetë edhe ai i propozuar për ta drejtuar, por pse jo edhe një prej presidentëve më të vjetër të klubeve të elitës, por që do të jetë me mandat të përkohshëm që do të saktësohet qartë në statut.