Kukësi, formacion me... pasaporta

34 kartonë të verdhë dhe probleme me disiplinën, Shpehar e nis gjithmonë nga stoli

Kukësi mbeti në migrim gjatë këtij sezo ni. Me “Zeqir Ymerin” që nuk plotëson parametrat, i është dashur që edhe të ndërrojë 4 stadiume të ndryshme kur luan si pritës. Pas 16 javësh kanë vetëm dy “kampionë” të minutave, ndërsa Dino Shpehar mbetet zgjedhja e parë e Armando Cungut nga stoli. Verilindorët mund të quhen edhe një ekip shumëkombësh dhe për të kuptuar këtë mjafton të përmendësh faktin që kanë në organikë 11 lojtarë me pasaporta të ndryshme. Me disiplinën dhe dëmtimet nuk e kanë fort mirë raportin, por as me kartonët. Është ky bilanci i kuksianëve pasi janë luajtur 1440 minuta...

-Një formacion me pasaporta për Kukësin. Ndryshe mund të quhet një ekip shumëkombësh, pasi veç futbollistëve me pasaportë shqiptare, kosovare e maqedonase, ka edhe nga ata me gjeorgjiane, braziliane, kroate, mozambikase, franceze, senegaleze, gjermane dhe boshnjake.

- Kukësi gjatë këtij sezoni u ka besuar 21 lojtarëve. E megjithatë, ka vetëm dy titullarë të padiskutueshëm. Ardian Cuculi dhe Edis Maliqi kanë marrë 1440 minuta në 16 javë. Pas tyre vjen Rexhinaldo me 1343 minuta..., i cili edhe pse nuk ka humbur asnjë ndeshje, një e ka nisur nga stoli dhe dy të tjera nuk i ka mbyllur. Simon Rrumbullaku është lojtari më pak i aktivizuar dhe kjo prej dëmtimeve, në total ka 4 ndeshje dhe 165 minuta.

- Dino Shpehar është zgjedhja e parë e Armando Cungut kur nis të bëjë zëv- endësimet gjatë një ndeshjeje, deri më tani është futur 10 herë nga stoli, nga 12 takime që numëron në total te verilindorët.

- Çyrbjes dhe Shafik nuk u ndodh shpesh që t’i mbyllin takimet që nisin, secili e ka lënë 6 herë fushën e lojës.

-Shpehar, Kalaja, Maloku janë grumbulluar në 14 ndeshje, por jo gjithnjë kanë mundur që të luajnë.

- Kukësi ka 16 gola në 16 ndeshje, një mesatare jo fort bindëse për një ekip që pretendon titullin.

- Arturo Rexhinaldo mbetet “bomberi” i ekipit me 6 gola të shënuar, ndërsa befasia vjen prej Uilliam Melos që numëron 5 rrjeta. Bilanci plotësohet me Ylli Shametin që ka realizuar 2 herë, si edhe Ethemi me Shpehar që kanë nga 1. Sakaq, dy të tjerët kanë qenë autogola, konkretisht ata të Frashërit dhe Teqjes në fitoren 0-2 me Kamzën.

- Nuk janë pak, por 16 lojtarë të ndëshkuar te Kukësi. Në total janë marrë 34 të verdhë për Kukësin. Dzaria dhe Zguro janë më të ndëshkuarit me nga 4. Me të kuqin kanë raport të mirë deri më tani, pasi vetëm Melo është ndëshkuar pas dy të verdhëve.

- Ylli Shameti është lojtari më i vjetër i Kukësit. Kapiteni është 34 vjeç, paçka se në fushë reflekton se po kalon rini të dytë. Sakaq, nga ata që kanë zbritur në fushë, me i vogli në moshë mbetet Valon

Ethemi, i cili është 21 vjeç.

- Pesë javë radhazi ka që nuk humb Kukësi, ndërsa pas dy barazimeve me Tiranën dhe Teutën, kanë marrë pikët maksimale me Kamzën, Luftëtarin dhe Skënderbeun.

- Kukësi është gjithnjë në rrugëtim. Jo vetëm që stërviten në Pezë-Helmes, por edhe në ndeshjet kur duhet të jenë pritës u është dashur që t’i zhvillojnë larg “Zeqir Ymerit”. Këtë sezon kanë ndërruar 4 stadiume, konkretisht kanë luajtur në “Selman Stërmasi”, “Loro Boriçi”, “Elbasan Arena” dhe “Kamza”.

- Kukësi del gjithnjë i karikuar nga dhomat e zhveshjes. Çerekorëshi i parë i pjesës së dytë është më i suksesshmi për ekipin e Armando Cungut. Deri më tani kanë shënuar 7 herë, pra 43.8% të golave në total. Jo fort efektivë janë në 30 minuta e para të takimit dhe në harkun kohor të 60-75', teksa kanë realizuar vetëm nga një gol.

- Flamurtari është ekipi që i ka marrë 6 pikë Kukësit në dy faza, tashmë mbetet për t’u parë nëse do evitojë që edhe Partizani t’i shkaktojë humbjen e dytë sezonale.

- Kukësi nuk fiton dot më thellë se me dy gola diferencë, ndërsa kujtojmë që vetëm me Tiranën ia ka dalë me shifrat 3-1.

- Dëmtimet, makthi i Kukësit. Vetëm për këtë sezon kanë pasur probleme Musolli, Rrumbullaku, Shameti e Shafik, që kanë vuajtur shumë deri më tani.

- Kukësi ka probleme me disiplinën, të paktën kjo reflektohet prej situatave të tensionuara me Rexhinaldon, dënimit të Çyrbjes apo konflikteve kontrakruale me Ethemin dhe Shkodrën.

- Presidenti i Kukësit bën mbledhje thuajse çdo javë dhe gjithnjë vendos si kusht fitoret, në të kundërt paralajmëron “bllokim” rrogash.

- Maloku, Kalaja, Zguro, Maliqi, Melo, Qaqi, Limaj, Shpehar, Harba, Çyrbja, Rexhinaldo, Ture, Cuculi, Krasniqi dhe Shafik erdhën në verë, megjithatë largimi i parë u bë shumë shpejt. Boshnjaku Harba nuk bindi dhe për pasojë erdhi edhe “divorci”.