Krasniqi: Ka ardhur koha t’i ulim me këmbë në tokë “demat”

Gëzim Krasniqi “kërcënon” Partizanin. Ish-mbrojtësi u shpreh se do të jetë një ndeshje e veçantë për të, por si profesionist është gati që t’i mundë. I pranishëm në konferencën e dhënë për mediat, shtatlarti foli pa dorashka në prag të këtij dueli, ndërsa hapur e thotë se ka ardhur koha që dikush t’i ulë me këmbë në tokë të kuqtë. “Do të jetë ndeshje emocionuese, pasi kam luajtur me Partizanin për disa vite. Sot jam me Kukësin për t’i mundur, ndërsa më parë ishte e kundërta. Është ndeshje e veçantë, shpresoj që ta fitoj. Partizani nuk ka gjë për të mos u mundur. Ka ardhur momenti për t’i ulur me këmbë në tokë”, u shpreh fillimisht 28-vjeçari. Kur pyetet për pikat e dobëta dhe të forta të kundërshtarit, ai përgjigjet: “Kemi folur me stafin për disa gjëra që duhet të bëjmë kujdes të mos ndodhin. Duhet të luftojmë deri në fund, siç kemi bërë në ndeshjet e tjera”. SKEMA – U bën 3 javë që Kukësi po luan me 3 mbrojtës. Edhe pse të kushtëzuar prej dëmtimeve, duhet thënë se kjo skemë ka rezultuar efikase. “Me 3 mbrojtës nuk ka qenë edhe aq keq ndeshjet e fundit dhe kjo duket te rezultatet, pasi kemi arritur të marrim 3 fitore dhe kemi luajtur mirë gjithashtu. Nuk e di si do të luajmë këtë ndeshje, nuk mund ta them nëse do të ndryshojë apo jo skema”, u shpreh kavajasi. REVANSHI – Kukësi në fazën e parë u “thye” një episod prej Partizanit, por këtë herë Krasniqi mendon se do të jetë ndryshe. Shpreson që të gjejë golin, megjithatë thekson se në shenjë respekti nuk do të festojë. “Ndeshjen e parë humbëm me një rast, na erdhën një herë në portë e na shënuan, mund ta them nga një pakujdesi e jona. Pjesa tjetër foli për ne, humbëm shumë raste. I mundëm me lojë, na mundën me rezultat, kjo ishte e gjitha. Nëse do të shënoj, nuk festoj. Shpresoj të shënoj”, shtoi mbrojtësi, që deri më tani numëron 4 ndeshje me Kukësin. HEBAJ - I pyetur për përballjen me Hebajn, ai thotë: “Për mua nuk ka problem nëse është Hebaj, Latif apo ndonjë tjetër përballë meje. Të gjithë janë njësoj. Duhet të zbatojmë detyrat dhe të jemi të përqendruar. Nuk më bën përshtypje as stili i Hebajt apo ai Bardhit, jam këtu për t’i ndalur në çdo mënyrë”. REXHINALDO – “Bomberi” i Kukësi duket se i ka harruar problemet, të paktën kështu shprehet Krasniqi. “Ka qenë i çorientuar prej problemeve familjare, ndaj nuk ka qenë i përqendruar maksimalisht. Tani po punon mirë dhe është gati të jap 100%”, përfundoi 28-vjeçari.