Beqiri e Teqja nisin stërvitjen, vlonjati Idrizaj: Shkojmë për pikë
Kamza përgatitet për transfertën, sytë nga dy qendërmbrojtësit
Kamza vijon stërvitjet normalisht, me shumë optimizëm, edhe falë rezultateve pozitive të dy javëve të fundit. Gjithsesi, ata do të kenë të shtunën një përballje mjaft të vështirë, siç është transferta vlonjate. Por trajneri Gjoka është i shqetësuar, pasi Teqja e Beqiri nuk janë ende 100% të gatshëm për sfidën me Flamurtarin. TEQJA E BEQIRI – Pas dy rezultateve pozitive në ndeshjet e fundit, duket se për trajnerin do të ketë një lajm të mirë nga infermieria. Pikërisht për dy qendërmbrojtësit e Kamzës, Olsi Teqja dhe Oriad Beqiri, që dolën të dëmtuar nga takimi i fundit me Luftëtarin. Pasi kanë kaluar 4 ditë, vijnë lajme të mira nga mjeku i skuadrës. Beqiri ka nisur stërvitjen, e po kështu edhe Teqja. Sinjal që lë të hapur mundësinë që mund të jenë të gatshëm për takimin e radhës. HEKTOR IDRIZAJ - Para këtij takimi ka folur mbrojtësi i majtë, Hektor Idrizaj, për të cilin kjo përballje është speciale, nisur edhe nga origjina e tij. “Me Flamurtarin është një ndeshje ku luhet vërtet futboll. Situata te Kamza është e mirë, pasi 4 pikët e marra janë frymëmarrje për ne. E pse jo, të shkojmë atje, të luajmë futboll, por edhe të marrim pikë. Do të jetë një sfidë mjaft e vështirë, ku edhe një pikë do të ishte shumë e rëndësishme për ne. Te Flamurtari kam kaluar një periudhë mjaft të mirë, por tashmë jam futbollist i Kamzës dhe mendoj për skuadrën aktuale”, shprehet mbrojtësi Idrizaj për “Panorama Sport”. Mbrojtësi vlonjat flet dhe për sfidën e fundit me Skënderbeun. “Sfida me Skënderbeun është diçka më e mirë për ne, pasi nuk është më ai ekip që të impononte lojën dhe ritmin. Mendoj se janë shumë të mundshme tri pikët, por gjithashtu e vlerësoj edhe kundërshtarin për moralin, pasi ka 7 vite që udhëheq kampionatin shqiptar”, vijoi ai. Për Kamzën, ka rëndësi ndeshja me Flamurtarin dhe për këtë, vlonjati shprehet: “E rëndësishme për Kamzën është të mos pësojë gol dhe të vijojë ritmi si në këto dy ndeshjet e fundit. Duhet të jemi me këmbë në tokë, duke vlerësuar kundërshtarin sepse ka lojtarë me shumë cilësi. Do të jetë një ndeshje me rëndësi për ne, pasi ndodhemi në zonën e ftohtë, por sigurisht që nuk është vendimtare, pasi ka mbetur më shumë se gjysma e kampionatit për t’u luajtur, ndaj mund edhe të rikuperojmë”, ka deklaruar Idrizaj.