Soue: Kurrë i kuq, në Korçë kthehem me kënaqësi
Skënderbeu e vuan mungesën e Ali Souesë dhe kjo është e qartë tashmë, por edhe, nga ana tjetër, ishsulmuesi i Kievos dhe i bardhekuqve duket se ka nostalgji për periudhën e kaluar te Skënderbeu. Ali Soue është konsideruar si një prej sulmuesve më të mirë që ka ardhur ndonjëherë në kampionatin shqiptar, kjo duke u bazuar në shifra. 24-vjeçari ishte pjesë e Skënderbeut edicionin e shkuar, duke arritur që të fitonte dhe titullin kampion, duke realizuar po ashtu edhe 21 gola. Këtë sezon, sulmuesi nga Gambia luan për skuadrën e CSKA Sofies, në Bullgari, megjithatë duket se ka krijuar një lidhje të fortë me vendin tonë. Një intervistë ndryshe, Soue ka zgjedhur që ta komunikojë përmes "Instagram"-it me ndjekësit e tij, ku ndër ta ka dhe shumë shqiptarë. Lojtari nuk ka nguruar që të jetë i hapur dhe i drejtpërdrejtë me përgjigjet e tij, ndonëse është pyetur edhe për një mundësi për të qenë pjesë e Partizanit. 24-vjeçari nuk e sheh veten pjesë e "demave", teksa përgjigjet me një "JO" të thatë, duke treguar besnikëri ndaj fanellës me të cilën u shpall kampion, por edhe kryegolashënues në Kategorinë Superiore. Nuk kishte si të mos pyetej nëse ekziston mundësia që një ditë ta shohim sërish me fanellën e korçarëve, nëse Skënderbeu do të rikthehet në arenën ndërkombëtare pas dënimit të dhënë nga UEFA. Italogambiani e pranon se është i lidhur me Korçën dhe se ai e ndien veten një "ujk", por lë të hapur gjithçka për të ardhmen. "Më ka pëlqyer shumë koha kur kam qenë në Shqipëri dhe unë do të jem një 'ujk' përgjithnjë. Unë nuk mund të parashikoj të ardhmen, por duhet të punoj fort tani dhe të presim se çdo të rezervojë e ardhmja", është shprehur Soue. Të ngrohur nga kjo përgjigje, ndjekësit e 24vjeçarit në "Instagram" kanë insistuar më tej, duke e vënë në pozitë që të zgjedhë mes CSKA Sofjes dhe Skënderbeut. Por zgjedhja e ish-golashënuesit të Skënderbeut ka qenë e thjeshtë. "Të dyja!" Nëse se keni ditur, Soue është tifoz i Arsenalit në arenën ndërkombëtare, diçka që ai vetë nuk ngurron që ta tregojë me të gjithë mbështetësit e tij.