Rrogozhinasit Egnatia u kërkon falje tifozëve

Kur duhet edhe një ditë nga përballja me Pogradecin, nën drejtimin e trajnerëve, rrogozhinasit po vijojnë me intensitet seancat. Përgatitjet e djeshme kishin në vëmendje ushtrimet teorike si dhe një lojë të shkurtër brenda grupit, nga ku u vunë re edhe ndryshimet që do të jenë në formacionin anti-Pogradeci. E veçanta është se rikthehet Dimo pas mungesës me Lushnjën, por mungon Karepi për shkak kartonësh dhe Ibrahimllari, në diskutim nga dëmtimi. Megjithatë, në kampin rrogozhinas nuk e diskutojnë fitoren përpara tifozëve të tyre. Në fazën e parë ishte Pogradeci që fitonte në shifrat 2-1, duke u shkaktuar humbjen e parë. Kujtojmë që të dyja skuadrat janë ndeshur më parë në miqësore dhe pas shumë vitesh mungesë bëjnë pjesë në një grup. Për "Panorama Sport", kapiteni Andi Bakiasi u shpreh optimist përpara sfidës së radhës. "Ishim duke kaluar një moment të mirë si skuadër, por humbja me Lushnjën na i prishi pak ekuilibrat. Nuk është se u paraqitëm dobët, por ishin dy episode që vendosën gjithçka. Mungesat e Dimos e Ibrahimllarit na kushtëzuan në disa drejtime, edhe pse stafi kishte gjetur zëvendësuesit. Tashmë, ajo përballje është arkivuar nga të gjithë ne dhe na bën që të mësojmë nga gabimet në vijim. Gjithashtu, edhe mungesa e tifozëve në shkallët e stadiumit ndikoi rreth atmosferës së përgjithshme. I kërkojmë falje çdo tifozi rrogozhinas për atë humbje të pamerituar. Që nga sfida me pogradecarët, do të nisë kthesa e duhur ku do bindim me lojë dhe rezultat", përfundoi kapiteni Bakiasi.