Përcaktohet shorti, kombëtaret e moshave njohin kundërshtarët
Dje, ekipet kombëtare të basketbollit të moshave u njohën me kundërshtarët e tyre europiane për eventet e vitit 2019, si për djem , ashtu edhe për vajza. Siç dihet, Shqipëria do të jetë vendi organizator i Kampionatit Europian U-16 të basketbollit për meshkuj, divizioni C. Kjo është hera e parë që një aktivitet i kësaj grupmoshe do të mbahet në vendin tonë. Ky kampionat do të zhvillohet në Tiranë dhe do të startojë në datën 14 korrik për t'u mbyllur më datë 21 korrik të vitit 2019. Në këtë kampionat do të marrin pjesë 10 skuadra, të cilat janë: Shqipëria, San Marino, Gjibraltari, Uellsi, Andorra, Malta, Austria, Armenia, Skocia, dhe Azerbajxhani. Përveç ekipeve pritet që në kryeqytet të mbërrijnë edhe një numër i madh vizitorësh dhe mbështetësish të këtyre ekipeve. Tashmë, kuqezinjtë U-16 mësuan edhe emrat skuadrave rivale. Shqipëria do të bëjë pjesë në grupin B, bashkë me San Marinon, Skocinë, Moldavinë dhe Luksemburgun. Kombëtarja U-18 e djemve do të jetë në Grupin B të divizionit C së bashku me Gjibraltarin, Armeninë, San Marinon dhe Maltën. Ndeshje, të cilat do të zhvillohen në datat 28 korrik deri në 4 gusht 2019 në Andorra. Ekipi U-20, i cili bën pjesë në Grupin B të divizionit B, do të luajë kundër Çekisë, Rumanisë, Bullgarisë dhe Finlandës. Sfidat do të mbahen në datat 12-21 korrik 2019. Ndërkohë, kombëtarja U-16 për vajza, e cila bën pjesë në divizionin B, u shortua në Grupin B bashkë me Irlandën, Bjellorusinë, Gjibraltarin, Portugalinë dhe Austrinë. Takimet e këtij divizioni do të luhen në Bullgari në datat 15-24 gusht 2019. Dhe në fund, ekipi U-18 i femrave do të luajë përballë Suedisë, Holandës, Ukrainës, Luksemburgut dhe Gjibraltarit. Skuadra që bëjnë pjesë në divizionin B dhe do të ndeshen në Maqedoni, në datat 5-14 korrik 2019.