Belica: Vuajtëm pa tifozë, meritë ka edhe... Kukësi
Egzon Belica mendon se Partizani vuajti më shumë se duhet mungesën e tifozëve. Sipas kapitenit të kuq, barazimi nuk duhet bërë dramë, për më tepër që vjen përballë një kundërshtari të fortë si Kukësi. Qendërmbrojtësi bëri të ditur se skuadra do të bëjë gjithçka për ta mbyllur me tri pikë në Gjirokastër, duke u shpallur kampione dimri.
Vetëm barazim, mendoni se Partizani e rikonfirmoi që është skuadra për t’u mundur apo duhet të merrte fitoren ndaj Kukësit...?
Është e vërtetë. Ne e mendojmë titullin, por pas një ndeshjeje si ajo me Teutën, si dhe stadiumi pa tifozë, na e bënë pak të vështirë. Të them të drejtën, Kukësi pjesën e parë na “zhyti” pak mbrapa, na e vështirësoi lojën tonë. Kishim dhe ne shanset tona, me Bardhin në pjesën e parë dhe me Hebajn në pjesën e dytë.
Megjithatë, ju duket kjo mënyra për të shkuar drejt titullit? Çfarë duhet të ndryshojë Partizani?
Ndeshja ndeshjes nuk i ngjan. Ne do të vazhdojmë drejt objektivave tona. Dihet që loja i ka të tria rezultatet brenda, kështu që duhet ta pranojmë këtë barazim dhe të vazhdojmë përpara. Kemi ndeshjen me Luftëtarin dhe do shkojmë atje për tri pikët.
Ndikoi mungesa e tifozëve në paraqitjen tuaj?
Patjetër, ndeshjet pa tifozë janë shumë të vështira. Së pari, sepse pa tifozë është shumë e vështirë për t’u karikuar dhe është e vërtetë që kjo ndeshje
u ndikua nga mungesa e tyre.
Kukësi ka mbrojtës shtatlartë, por çuditërisht ju luajtët me topa të lartë. E paramenduar?
Jo, Kukësi na vendosi pak në vështirësi, nuk mundëm të dilnim në lojën tonë dhe patjetër që do provonim me topa të gjatë.
A e mendoni se ky Partizan mundet ta ruajë këtë diferencë deri në fund?
E thashë e pak më parë, ndeshjet i kanë të tria rezultatet brenda. Në këto dy ditë do presim kundërshtarët dhe pastaj pas një jave do të shkojmë për tri pikët në Gjirokastër.
A prisni ndonjë dhuratë nga Luftëtari që të shpalleni kampion dimri një javë para?
Jo, aspak.
Përveç Kukësit dhe Skënderbeut, cilat ekipe mendoni se do të keni rivale deri në fund?
Renditja tregon për Skënderbeun dhe Kukësin, por do të jetë një luftë e fortë. Unë nuk do lija pas edhe ekipin e Flamurtarit.