Libohova: Do shumëfishohen të ardhurat, financat... kriter i rëndësishëm

Presidenti i parë i Ligës Profesioniste të Futbollit

Zëvendëspresidenti aktual i FSHF-së, Edvin Libohova, është përzgjedhur presidenti i Ligës Profesioniste. Pas vendimit, ai ka komentuar për mediat pozicionin e tij dhe se çfarë pritet të ndryshojë me këtë hap që është ndërmarrë nga klubet e Kategorisë Superiore. President, çfarë është Liga?

Prej kohësh kemi diskutuar me ekipet e Superligës për ta krijuar Ligën. Qëllimi i saj është që brenda këtij grupimi të gjejmë rregulla dhe forma organizimi që të ndihmojnë më shumë garën, por sidomos për të rritur pavarësinë organizative dhe financiare të klubeve. Dihet që, në radhë të parë, pa një financë të fuqishme, futbolli nuk mund të ecë para. Kemi dakordësuar të gjitha problemet që lidhen me statutin dhe shumë shpejt do të fillojmë të rregullojmë marrëdhënien me federatën, pasi Liga do të jetë anëtare e FSHF-së. Tani fillon puna reale. Mendoni se klubet kanë financat e mjaftueshme për këtë organizim? Një pjesë e klubeve kanë probleme dhe do të jetë një nga prioritetet që Liga do të ketë për të sistemuar financat. Për t'i forcuar ato dhe të jenë më efektive. Gjithashtu, jo thjeshtë të luhet futboll, por në kushte sa më të mira teknike dhe financiare. Sa i vështirë ishte dakordësimi, pasi merreni me këtë prej muajsh? Ishin diskutime lidhur me statutin, nëse Liga do të jetë krejtësisht e pavarur apo do të jetë një institucion brenda FSHF-së. Në fakt, do të jetë si anëtarët e tjerë, por me organizim ndryshe. Duke gjetur dhe gjuhën për të zbatuar dhe kuadrin legjislativ sportiv që kemi, por dhe kriteret që ka FIFA dhe UEFA për organizimit për të tilla formate. Cili do të jetë hapi i radhës?

Pas regjistrimit në gjykatë, hapi tjetër është të ngrihen strukturat teknike në lidhje me problemet financiare, juridike dhe sportive. Do të ketë kritere financiare për skuadrat pjesëmarrëse në Ligë?

Kriteret për të qenë anëtar i Ligës janë ato që ka vendosur FSHF, nuk ka ndryshime. Nga pikëpamja e statutit, çdo klub i Superligës humbet të drejtën e pjesëmarrjes në Ligë sapo del nga Superiorja dhe e kundërta, çdo klub që ngjitet bëhet pjesë e Ligës. Do të ketë përfitime dhe shuma disa herë më të mëdha sesa sot. Çfarë mund të thoni për pozicionin tuaj si zëvendëspresident i FSHF? Është kompetencë e asamblesë së federatës, sepse do bëhen ndryshime në statut që presidenti i Ligës do jetë automatikisht pjesë e KE-së. Të tjerat do diskutohen në ndryshimet që do bëhen në statutin e FSHF-së. Do jetë gati Liga për sezonin e ri?

Patjetër që gjithçka pritet të jetë gati për sezonin e ardhshëm. Çfarë do të ndodhë me të drejtën televizive?

Do të ketë të drejtë të menaxhimit në masën 100%. Kontrata aktuale do të vazhdojë siç është, por ka edhe burime të tjera. Nëse do të rinegociohet, do të jetë dakordësi e sponsorit dhe e Ligës. Do të ketë ndikim te financat e klubeve ky ndryshim i madh? Në vitin e parë mos prisni çudira. Ne do të kërkojmë forma të tjera, duke nisur nga emri i Superligës, që mund të krijojë të ardhura të mëdha nga sponsori që do të blejë të drejtën e emrit.