Shpërthejnë akuzat, tani luhet edhe në... baltë
Kur ka mbetur për t’u luajtur edhe një javë për këtë vit, presioni është rritur, akuzat janë shpeshtuar dhe një pjesë e fushave janë thuajse të papërshtatshme për të luajtur. Kjo javë që u mbyll dje i prodhoi të gjitha, nga ndeshjet emocionuese, golat spektakolarë, dorëheqjet e trajnerëve dhe akuzat mes klubeve. Adrenalina është rritur dhe pas sfidës Erzeni-Dinamo ku shijakasit fituan me rezultatin 2-1, ishin blutë që shpërthyen në akuza ndaj drejtuesve shijakas se kishin ndikuar te gjyqtarët për të ndihmuar vendësit që të fitonin. Më pas ishin shijakasit që reaguan duke deklaruar se Dinamo ka si donator zv.presidentin e FSHF-së. Duket se ekipet pretendente për vendin e parë kanë nisur edhe një “luftë” tjetër, përveç asaj që zhvillohet në fushë. Erzeni është afruar me pesë pikë me Vllazninë e vendit të parë. Shkodranët kanë gabuar në momentin më të mirë për të ruajtur diferencën me Erzenin. Kuqeblutë udhëhiqnin 1-0 deri në minutën e tretë shtesë ku një eurogol i Isaga Kamara i Besëlidhjes shtang shkodranët. Vora e vendit të fundit arrin t’i shkëpusë një pikë Korabit në sfidën e luajtur në Pezë. Vorakët mund të konsiderohen me fat, pasi dibranët humbën një penallti dhe goditën traversën në atë takim. Shënkolli vazhdon të mos gabojë në fushën e vet ku përballë Burrelit fiton minimalisht 1-0. Skuadra lezhjane mbetet në garë për të qenë në 5-shen e parë pas dy fazave të para. Veleçiku nuk është më surprizë në këtë kampionat. I rikthyer në Kategorinë e Parë pas katër vitesh mungesë, Veleçiku ka fituar dje në Fushë-Krujë ndaj Ilirisë. Një 3-pikësh që e ngjit skuadrën në vendin e 5-të në klasifikim me pikë të barabarta me Besëlidhjen. Në Grupin B vazhdon një luftë e fortë dhe e ashpër për vendet e para. Supersfida e javës mes Bylisit dhe Besës mbyllet në barazim pa gola. Ballshiotët kishin shansin që të shkëputeshin më shumë në renditje, por nuk ia arritën qëllimit. Ndërsa, kavajasit mbeten në vendin e dytë. Surpriza më e madhe vjen nga Fieri ku Apolonia mundet në fushën e vet nga Elbasani. Verdheblutë fitojnë 2-0 dhe pas ndeshjes trajneri i skuadrës fierake, Marjol Miho, jep dorëheqjen. Fierakët i largohen edhe më shumë vendit të parë dhe tashmë gjithçka vështirësohet për të kapur elitën. Orikumi rikthehet te fitorja pas pesë humbjesh radhazi. Bregdetarët fitojnë 1-0 ndaj Tomorit në një fushë ku 90 për qind e saj ishte e mbuluar nga balta dhe uji. Një terren krejtësisht i papërshtatshëm për të luajtur një ndeshje normale, ndërsa gjyqtari do duhej të kishte ndërhyrë për ta ndërprerë këtë sfidë. Në fund janë bregdetarët që fitojnë 1-0 dhe mbeten në mesin e tabelës me synimin për të qenë në 5-shen e parë pas dy fazave të para. Lushnja bie në ndeshjen që në letër konsiderohej shumë e lehtë. Në transfertën e Cërrikut përballë Turbinës, lushnjarët munden 1-0, ndërsa takimi luhej pa tifozë dhe nuk kishte presion. Lushnja humbi një shans të mirë që t’u afrohej dy ekipeve të vendeve të para. Egnatia ka hedhur një hap të rëndësishëm për të qenë në 5-shen e parë pas dy fazave të para. Rrogozhinasit kanë fituar 2-0 ndaj Pogradecit dhe u janë afruar kryesuesve. Diferencat në Grupin B të Kategorisë së Parë janë të vogla dhe pritet që gara deri në fund të jetë e ashpër.
Besar Bozgo