Lushnja, si do shpenzohen 340 milionë lekë
Pjesa më e madhe do harxhohen në 6-mujorin e parë
Bashkia e Lushnjës ka një plan vjetor për të shpenzuar 340 milionë lekë të vjetër për klubin e futbollit, një pjesë e të cilave i shkojnë ekipit verdhejeshil. Referuar shpenzimeve në lekë, ndarë sipas muajve, bie në sy fakti që nga janari deri në maj, klubi lushnjar do të subvencionohet me 33 milionë lekë të vjetër në secilin muaj. Për muajt qershor dhe shtator shpenzimi parashikohet 30 milionë lekë. Ndërsa për muajt korrik, gusht, tetor, nëntor dhe dhjetor parashikohet 23 milionë lekë në muaj. Sipas grafikut duket qartë një rënie në gjashtë muajt e dytë të vitit. Bashkia e Lushnjës është aksionerja e vetme e KF Lushnja 1930 sh.a. Vetëm në tri vitet e fundit, pa përfshirë disa shuma që vijnë nga biletat apo përfitime të tjera, nga bashkia kanë dalë 1 miliard e 140 milionë lekë të vjetër për futbollin. Vazhdimisht është diskutuar për aksionerë të tjerë, por deri më tani nuk është hedhur asnjë hap në këtë drejtim. Të gjithë aktorët e futbollit në Lushnjë i kanë bërë thirrje kryebash- kiakut Fatos Tushe që të privatizojë klubin, pasi kjo do të bënte të mundur që ekipi të funksiononte në mënyrën e duhur dhe të mos qëndronte në elitë vetëm një vit. Edhe pse është premtuar në shumë raste se do të ndërmerren hapa konkretë për sa i përket privatizimit të klubit, një gjë e tillë nuk ka ndodhur deri tani. Kjo situatë ndikon drejtpërdrejt tek ekipi që nuk mbijeton më shumë se një vit në Superiore.
SITUATA
Humbja 0-1 me Turbinën, në “Nexhip Trungu” të Cërrikut bëri që verdhejeshilët lushnjarë të humbitnin një vend në tabelë. Për momentin skuadra e drejtuar nga Ilir Gjyla ndodhet në vendin e katërt. Me një pikë më shumë se vendi i pestë, Pogradeci dhe 7 pikë më pak se vendi i parë, Bylisi. Pas pushimit të së dielës, lushnjarët nisën dje javën përgatitore në kuadrin e derbit me Apoloninë, që është ndeshja e fundit për vitin 2018. “Derbi i Myzeqesë” është vendosur të luhet të dielën në “Roza Haxhiu” në orën 13:30 pa praninë e spektatorëve. Për herë të parë në përballjet midis
këtyre skuadrave, ky takim do të luhet pa tifozë. Kjo është ndeshja e tretë radhazi që Lushnja luan pa praninë e publikut dhe e gjashta në shtatë ndeshjet e fundit. Pritet që në janar, ekipi të hyjë në merkato dhe në skuadër të afrohen disa lojtarë. Stafi teknik me në krye trajnerin Ilir Gjyla po sheh disa mundësi për të ndërhyrë në merkato dhe për të afruar futbollistët që do të fuqizonin edhe më shumë ekipin për pjesën e dytë të kampionatit. Gjatë kësaj jave, stafi do të kërkojë të korrigjojë gabimet që u bënë në ndeshjen me Turbinën.