24 lojtarë “braktisën” Shqipërinë për... Kosovën
IPKO Superliga e zaptuar nga "yje", migruan edhe 7 trajnerë
Dikur ishin lojtarët nga Kosova që lakmonin Shqipërinë, por tashmë situata ka ndryshuar kah. Të kushtëzuar për të luajtur në një kampionat të papranuar nga FIFA e UEFA, talentet kosovare i kishin gjithnjë "sytë" nga Shqipëria. Por, pas lajmit të madh të marrë nga instancat ndërkombëtare, tashmë edhe lojtarët e Shqipërisë kanë filluar që ta shohin si opsion të mirë Kosovën. Me infrastrukturën që ka filluar të përmirësohet, klubet kanë hedhur një hap të madh drejt profesionalizmit. Janë rritur në cilësi dhe detyrimisht kanë menduar që edhe me merkaton të jenë jo vetëm të kujdesshëm, por të shpenzojnë disa parà më shumë. Për të kuptuar këtë, mjafton të shohësh numrin e lojtarëve të federuar në IPKO Superliga për sezonin 20182019. Pas një hulumtimi të bërë enkas nga "Panorama
Sport", rezulton se nuk janë pak, por 24 futbollistë që kanë vendosur të vazhdojnë karrierën në kampionatin kosovar për këtë edicion. Dhe nuk bëhet fjalë për emra dosido, por për lojtarë që i kanë dhënë tonusin Kategorisë Superiore ndër vite. Dhe Kosova duhet thënë që për disa shihet si shans për t'u ringjallur, por për të tjerë edhe për të stabilizuar situatën financiare. Nga 12 skuadra që garojnë në këtë kampionat, vetëm 3 nuk kanë asnjë shqiptar në organikë. Flamurtari i Prishtinës, Ballkani i Suharekës dhe KEK-u janë skuadrat e vetme që nuk kanë bërë merkato në Shqipëri. Gjilani me Trepçën janë ekipet që kanë më shumë shqiptarë, nga 5 secila, por as Drita nuk mbetet pas, pasi ka afruar 4. Ekipet kryesuese, të cilat po garojnë për titullin kanë vetëm nga një. Mario Morina mbron ngjyrat e Prishtinës, ndërsa Artur Magani të Feronikelit.
Në dy sezonet e fundit edhe trajnerët shqiptarë kanë vendosur që të ndërrojnë ambient. Tashmë, për ta nuk është vetëm Shqipëria opsion që të praktikojnë zanatin. Kos- ova është kthyer në një alternativë dhe jo vetëm për ata që duan të hedhin hapat e parë në fushën e trajningut, por edhe prej të afirmuarve që trofetë e fituara i kanë të shumtë mbi shpinë. Shembulli konkret është Mirel Josa. Drejton Prishtinën që prej nisjes së këtij sezoni dhe, pasi është mbyllur pjesa e parë e kampionatit, lufton për titullin. Trajneri që dy sezone më parë nuk e shmangu dot rënien e Tiranës nga kategoria, tashmë po bëhet gati që të rikthehet te trofetë dhe me një tjetër ekip bardheblu. Me objektiva të mëdha e nisi edhe Drita e Shpëtim Duros. Megjithatë, në javët e fundit gjilanasit kanë humbur disi terren dhe vitin 2018 e kanë mbyllur të 6-ët dhe me një shkëputje prej 17 pikësh. Sakaq, edhe në Ligën e Dytë kosovare është Samuel Nikaj në "timonin" e Vushtrrisë. Sezonin e nisën në stol edhe Sulejman Starova me Feronikelin dhe Gugash Magani me Trepçën, por që të dy u shkarkuan. Nëse kthehemi jo më larg se një vit përpara, edhe Bledi Shkëmbi me Bledar Devollin. I pari drejtoi Lirinë e Prizrenit, ndërsa i dyti ngjiti KEK-un në IPKO Superliga.