Dështimi në verë, Luftëtari ndryshon strategji për janarin
Klubi pret shpërthimin e të rinjve Eraldo Hyseni dhe Aldrit Oshafi
Trajneri Gentjan Mezani dhe drejtori sportiv i Luftëtarit, Gentian Nora, po ndjekin një tjetër strategji në prag të hapjes së merkatos së janarit. Në ndryshim nga merkotja e verës, ku gabimet kanë qenë të shumta nga ish-drejtuesit, duke afruar lojtarë, të cilët nuk përmbushën pritshmëritë, tashmë klubi do të hedhë sytë nga të rinjtë, të cilët janë aktualisht pjesë e skuadrës, por që kanë marrë pak minuta në dy fazat e para. Dy elementë shumë premtues janë mesfushori Eraldo Hyseni dhe sulmuesi Aldrit Oshafi, të dy nga Berati. I pari është vetëm 19-vjeç dhe është aktivizuar në 7 ndeshje, teksa vetëm në fitoren 1-0 ndaj Kamzës në Gjirokastër e ka nisur si titullar. Ndërsa 18vjeçari Oshafi ka luajtur vetëm 5 minuta në takimin e parë të kampionatit.
Mesfushori me tipare sulmuese shihet si zëvendësuesi ideal i Eduard
Rrocës, i cili nga janari do të jetë pjesë e Kukësit. "Kam vite që jam stërvitur te skuadra ime e origjinës, Tomori, dhe me aftësitë e mia mund t'ia dalë për të qenë pjesë e rëndësishme e Luftëtarit në vazhdimësi. Edhe pse nuk kam marrë shumë minuta, mendoj se në ndeshjen me Kamzën për kampionat dhe me Vorën për Kupë, kam dhënë maksimumin. Në verë pata shumë oferta nga klubet e tjera, por Luftëtari më bëri për vete. Dua të eci në gjurmët e Bregut dhe Abazaj. Me punë besoj se do ia dalë", deklaroi fantazisti Hyseni për "Panorama Sport".
ALDRIT OSHAFI -
Një tjetër talent beratas që pret më tepër minuta te Luftëtari është Oshafi, i grumbulluar rregullisht edhe me Kombëtaret e moshave. "U bëra pjesë e Luftëtarit me besimin dhe bindjen e plotë se kam për të dhënë shumë për këtë skuadër. Edhe
pse nuk kam marrë shumë minuta në këmbë në ndeshjet e kampionatit, kur më është kërkuar kontributi si sulmues, veçanërisht në ndeshjet e Kupës dhe me të rinjtë, besoj se kam justifikuar fanellën e Luftëtarit. Dua të eci në gjurmët e Vasilit (i referohet Shkurtajt).
Nga ai kam mësuar shumë gjëra dhe mbetem i prirur për të justifikuar denjësisht fanellën e Luftëtarit", theksoi 18-vjeçari, për të cilin ky është sezoni i parë në Kategorinë Superiore. Në dy vitet e kaluara ka qenë pjesë e Tomorit dhe Besës.