Besa thyen rekord, 6 të rinj ndaj Bylisit

Tashmë kanë bërë emër brenda Shqipërisë, por edhe jashtë saj. Janë të gjithë talente, të cilëve Besa si asnjë klub në Shqipëri u hapi dyert, i aktivizoi, besoi tek ta, i mbështeti dhe ata ia shpërblyen. Ndërkohë që klube të tjera vrapojnë të marrin edhe lojtarë të huaj 30-vjeçarë dhe t’i paguajnë mijëra euro, Besa përtej mbështetjes së talenteve, jep një shembull ideal të vazhdimësisë së futbollit shqiptar. Mjafton të citojmë disa emra që nga portierët Dajsinani te Skënderbeu e Puja te Kastrioti, Krasniqi te Skënderbeu e Krasniqi tjetër te Kukësi, Lushkja te Laçi, për të vijuar me ish-ët kosovarë nga Bernard Berisha, Fejzullai, Jashanica, Muriqi në Turqi, Cikalleshi gjithashtu në Turqi, Deliu në Kroaci, por edhe talentet Bruno Dita, Arapi e tjerë. Të gjithë këta futbollistë erdhën te Besa adoleshentë, atëherë kur askush s’i përfillte e sot shumica e tyre jo vetëm kanë kaluar në Europë, por kërkohen sot me ngulm në treg nga ekipet elitare. Cituam këta emra jo më kot, pasi në sfidën e fundit ndaj Bylisit, kavajasit dëshmuan se vijojnë këtë traditë të evidentimit, përkrahjes mbështetjes e aktivizimit të tyre. Në sfidën tejet të vështirë në Ballsh në formacionin verdhezi bënin pjesë plot 5 18-vjeçarë dhe Koldashi e Biba 21-vjeçarë. Sulmuesi Tedi Cara 18 vjeç dhe me radhë qendërmbrojtësi Shaljani, Arbër Deliu, mbrojtësi Arianit Krasniqi, Bler Thaçi të gjithë 18-vjeçarë. E të mendosh se përballë kishin Bylisin me lojtarë të huaj shumë të investuar, atëherë kupton riskun, por edhe besimin që presidenca dhe stafi teknik i Besës ka te këto talente.

Feriz Ferizaj