Trajneri debuton në "derbi", Apolonia pret kthesën e madhe
Mbrojtësi Nako: Është momenti të fitojmë me Lushnjën
Nën drejtimin e stafit të ri teknik, skuadra fierake po përgatitet me përqendrim maksimal për takimin e radhës. Ndeshja e fundit për këtë viti përkon me një transfertë të vështirë për Apoloninë, pasi do të luajë në derbin myzeqar me Lushnjën. Bardhejeshilët vijnë pas dy humbjeve radhazi në kampionat dhe i kanë komplikuar ndjeshëm pozitat e tyre, por ndaj lushnjarëve do të synojnë të bëjnë një paraqitje dinjitoze dhe të mos dalin "duarbosh" nga "Roza Haxhiu". Qendërmbrojtësi Rudin Nako shpreh konsideratat më të mira për "lagunarët", por njëherësh ka besim te reagimi pozitiv i skuadrës së tij, si autokritikë pas humbjes me Elbasanin.
"Kemi pësuar dy humbje radhazi dhe kjo situatë na i ka vështirësuar pozitat në tabelë. Humbja me Elbasanin na ka rënduar shumë, por nuk duhet të demoralizohemi. E kemi lënë pas dhe tani jemi përqendruar vetëm në ndeshjen kundër Lushnjës, një skuadër që meriton fjalët më të mira dhe respekt maksimal, gjithmonë një rivale e denjë. Ndeshjet tona me ta gjithmonë kanë qenë të bukura, plot rivalitet dhe garë sportive, ku të dyja skuadrat e kanë kërkuar me ngulm suksesin ndaj njëratjetrës. Edhe këtë herë mendoj se do të jetë një takim i fortë dhe i rivalizuar, ku pa dyshim ne do të luajmë për rezultat pozitiv. Unë besoj se kemi forca, duke bërë reagimin e duhur pas dy javëve jo të mira që kemi kaluar", thotë mbrojtësi fierak. Ndeshja me Lushnjën do të jetë e para për stafin e ri teknik dhe kryepankinën Kule.