Roma i bën vizitë, me Juven sheh vetëm makthe
"Ronaldo do të pushojë në një nga dy ndeshjet e radhës"
Në çdo konferencë për shtyp, Masi miliano Alegri gjen gjithnjë një arsye për të mbajtur të hapur çështjen e titullit në kampionatin italian. Për këtë arsye, renditja me të cilën nis një seri takimesh të vështira për Juven e tij, është e "rreme". Siç shpjegoi në fjalën e tij, trajneri bardhezi: "Nuk i besoj klasifikimit aktual, ai që duhet të marrim për bazë do të jetë ai i datës 29 dhjetor, pasi të kemi luajtur kundër Sampdorias. Ndaj Romës duhet kujdes, pasi nuk duhet të lejojmë që diferenca e pikëve të na mashtrojë. Di Françesko ka një skuadër me shumë cilësi, ndaj nëse nuk futemi në fushë me mentalitetin e duhur, mund të kemi disa vështirësi. Do të jetë mirë nëse tregohemi agresivë që në fillim. Ronaldo do të luajë që nga minuta e parë, për pushimin e tij do të mendojë në një nga dy ndeshjet e javës së ardhshme, në Bergamo ndaj Atalantës, ose mbase kundër Sampit".
RROTACION - Formacioni anti-Roma do të stilohet në bazë të karakteristikave të rivalëve, por edhe në funksion të dy takimeve që i duhen Juves për të mbyllur vitin. Në portë do të jetë Shezni, në mbrojtje De Shilio ("Por Kanselo është duke u riaftësuar mirë pas ndërhyrjes kirurgjikale"). Në krah të kapiten Kielinit që nuk do të luajë kundër Sampit më 29 dhjetor, do të ketë hapësirë për Benatianë ("Bonuçi ka luajtur më shumë se të gjithë shokët e tjerë"). Në fushë sot edhe Aleks Sandro, i cili duket më i qetë pas rinovimit të kontratës me "Zonjën". Alegri nuk e ka problem të zbulojë të plotë 11shen, duke siguruar për emrat e mesfushës: "Pjaniç titullar sepse askush nuk e 'qev-
eris' ekipin me ritmet e tij, teksa Bentankur dhe Emre Xhan duhet të rriten ende në aspektin e shpejtësisë së veprimit kur luajnë si regjisorë. Pranë boshnjakut do të luajnë nga minuta e parë edhe Matuidi dhe Bentankur, teksa Khedirën e kam grumbulluar sepse ka përparuar shumë në
aspektin e riaftësimit". Nëse ka dyshime, për Alegrin ato i përkasin vijës së parë, ku Bernardeski dhe Duglas Kosta mezi presin të luajnë, duke i dhënë mundësi pushimi njërit mes Manxukiçit dhe Dibalës, me argjentinasin favorit për t'u ulur në stol.
MERKATO - Protagoniste
në çdo kompeticion, Juvja duket se nuk do të jetë e tillë në merkaton e janarit. Dje Alegri ka shkëmbyer urimet për festat e fundvitit me Anjelin, por siç siguron trajneri, mes tyre nuk ka pasur biseda në lidhje me përforcimin e skuadrës në muajin e parë të 2019-ës. "Nuk shkëmbyem ide merkatoje, por thjesht urimet për festa. Skuadra aktualisht është konkurruese dhe e vetmja gjë që ka rëndësi janë rezultatet nëpërmjet paraqitjeve dinjitoze", sqaroi Alegri. Ka një mundësi largimi për Spinacolën, e ardhmja e të cilit varet nga gjendja e Huan Kudrados. Kolumbiani ndodhet në Gjermani ku po vendos mbi mundësinë e operimit, por e ardhmja e Juves kalon te ndeshja me Romën. "Na duhen 87-88 pikë për titullin, maksimumi 90. Nëse u afrohemi 55 pikëve që tani, do të ishim në një nivel të duhur për titullin", përfundoi tekniku.