Nexhipi: Me Rrocën dhe Shkurtajn jemi super
"Nuk do ndryshojmë shumë në merkaton e janarit, skuadra është në rritje të vazhdueshme"
Kukësi ka bërë dy goditje mjaft të mira në merkato, pasi ka arritur të afrojë dy "yjet" e Luftëtarit dhe nga lojtarët më në zë të kampionatit, Eduard Rrocën dhe Vasil Shkurtajn, dhe pse ky i fundit akoma jo zyrtarisht. Është drejtori sportiv i Kukësit, Nderim Nexhipi, ai që së bashku me presidentin Gjici kanë udhëhequr këto operacione. Kukësi ka mundur konkurrencën e Partizanit, e tani synon me çdo kusht titullin kampion. Në një intervistë ekskluzive për "Panorama Sport", drejtori Nexhipi tregoi detajet dhe prapaskenat e këtyre afrimeve, si dhe strategjinë e Kukësit për të shkuar drejt titullit.
Rrocën dhe Shkurtajn i synonte Partizani dhe po i merr Kukësi, kështu do i sfidoni edhe për titullin?
Është normale që të ketë interes për çdo lojtar që është interesant. E di që për ta ka pasur interes dhe nga klube te tjera të Superiores, por më bëhet qejfi që kemi arritur akordin me ta dhe që të dy do të jenë pjesë e Kukësit që nga janari. Sa i përket garës për titull, janë tri apo katër ekipe në garë dhe besoj deri në fund se do vazhdojnë kështu.
Jeni forca e tretë e kampionatit me 5 pikë më pak se kreu, çfarë mund të ndryshojë nga java e fundit e 2018-ës dhe në vazhdim?
Po, është java e fundit e vitit dhe unë jam në një mendje me trajnerin. Ne po punojmë mirë dhe kemi bërë shumë mirë këto javët
e fundit, por nga eksperienca them se duhet të shohim vetëm ndeshjen e radhës, e cila duket në letër si takim i lehtë, por për ne është ndeshja më e vështirë e kampionatit. Shpresojmë që të marrim tri pikët me Kastriotin pastaj të shohim çdo të ndodhë me të tjerët, gjë e cila nuk është në dorën tonë. Ne duhet të bëjmë vetëm detyrën tonë, të fitojmë takimin.
Titulli, a është objektiv i padiskutueshëm i Kukësit?
Normale, se me ekipin dhe potencialin që kemi,
jemi kandidatë për titull. Ne shpresojmë që të vazhdojmë me ndeshje të mira e në fund të na shpërblehet puna me titullin kampion. I kemi të gjitha mundësitë dhe do luftojmë deri në fund.
Si përgjegjës i merkatos së Kukësit, çfarë note do i vendosnit vetes për blerjet e bëra dhe a keni "pengje"?
Në merkato kemi afruar shumë lojtarë, e të gjithë ata që dinë nga futbolli kuptojnë se secilit i duhet koha e nevojshme për t'u përshtatur. Megjithatë, unë jam i bindur që kanë potencial,
të cilin disa janë duke e shprehur dhe do vijojnë me intensitet më të lartë. Kemi krijuar një grup të mirë me lojtarë cilësorë. Nuk më takon mua t'i vendos notë vetes, por jam i bindur që kemi potencial dhe nga java në javë po e tregojmë.
Me afrimin e fantazistit Rroca, pas janarit kush do sakrifikohet?
Me afrimin e Rrocës mendoj se do të jemi edhe më të mirë e të fuqishëm në mesfushë. Kualitetin dhe atë ç'ka dhënë ai me Luftëtarin e dinë të gjithë në Shqipëri. Shpresoj që të përshtatet sa më shpejt e të bëjë atë që ka bërë te Luftëtari dhe të ndihmojë sa më shumë ekipin. Tani për tani nuk do largohet njeri, pasi mendojmë që të gjithë mesfushorët të kenë konkurrencë në ekip, të punojnë shumë e pastaj i takon trajnerit Cungu që të zgjedhë.
Janë larguar Harba dhe Zderiç, sa të tjerë do i ndjekin në janar?
Është fakt që Harba u largua para rreth një muaji e gjysmë nga Kukësi. Për momentin nuk do të ketë largime të tjera, por do të ulemi me presidentin dhe trajnerin e do shohim se çfarë do të bëjmë. Gjithsesi, një gjë është e sigurt, që në ekip nuk do ketë shumë ndryshime. Nuk do të bëjmë shumë ndryshime, pasi boshtin e kemi, lojtarët i kemi, konkurrenca është rritur, ndaj shpresojmë që të bëjmë sa më mirë kështu.
Si u zhvillua operacioni për Shkurtajn dhe kur do të mund të quhet i mbyllur zyrtarisht?
Sa i përket Shkurtajt, por dhe Rrocës, presidenti Gjici ka udhëhequr operacionet, pasi ai ka negociuar me homologun e tij, presidentin e Luftëtarit dhe kanë arritur marrëveshjet. Unë kam qenë në një linjë dhe bashkë me presidentin tonë. Shumë shpejt do ta kemi zyrtare dhe marrëveshjen me të.
Cilat janë prioritetet e radhës të Kukësit dhe Nexhipit në merkato?
Me afrimin e Rrocës dhe Shkurtajt, mendoj se kemi bërë përforcimet e duhura dhe efikase për ekipin. Me ta do të jemi akoma më të fortë. Nuk e di nëse do ketë vend edhe për një lojtar të tretë, por një gjë është e sigurt, që tashmë ndryshimet do jenë minimale.