Tirana e bën festë me vlonjatët, Idrizi: Flamurtari nuk fiton kur s''merr lekët...
Ardheblutë humbasin raste, loja e vlonjatëve për t u harruar
Më në fund Ardian Mema mund të flejë i qetë! Nuk do të ketë makthet e gabimeve të skuadrës së tij. Tirana ka mundur Flamurtarin në "Selman Stërmasi", ndërsa bardheblutë largohen nga vendi i parafundit, që ishin pak orë se të niste sfida me vlonjatët. Në një ndeshje delikate për të dyja skuadrat, sepse Tirana vinte nga humbja me Laçin, e cila e ktheu në tokë sapo bardheblutë kishin ngritur kokë, dhe Flamurtari që vazhdon të lëngojë për shkak të financave, ia del sakrifica kryeqytetase. Në momentin më të vështirë, kur duhej karakter, kanë qenë bardheblutë që kanë ngritur kokë dhe me një gol të Edon Hasanit 120 sekonda nga fundi i lojës së rregullt, kanë larguar krizën e rezultateve. Mema e bardheblutë mund të marrin frymë lirisht deri në fund të janarit, pasi moralisht kjo fitore do të thotë shumë. E kundërt është situata në Vlorë me Ilir Dajën dhe Flamurtarin e tij që, veç problemit të madh të rrogave, sheh një skuadër pa dëshirë.
NDESHJA - Të dyja skuadrat kanë pasur ndryshime në formacion. Te vlonjatët nuk luante Bushiç i dëmtuar, ndërsa në krahun tjetër Mema kishte gozhduar në stol Dajën e Karabecin. Me pak tifozë në stadium, rasti i parë në minutën e tretë është i Tiranës, me Halilin e Grecën që mund të shënonin, por Koliçi kthehet në hero. 12 minuta më vonë, Sentamu çmarkohet mirë, gjuan menjëherë, por Koliçi sërish bën mrekullinë. Flamurtari duket te porta e Abibit në minutën e 21të, me Kalenë që kërkon të shënojë gol me kokë, por pa rezultat. Në minutën e 31-të, Turtulli jep një pas për Kërçikun, i cili i shmanget Kotobellit, hyn në zonë dhe jep një top që kalon gjithë pasqyrën e portës, devijohet, shkon te Kobina që gjuan, por sfera devijohet nga Useini. Rasti më flagrant është ai i minutës së 42-të, me Grecën që vjedh një top nga e djathta, lëshon sferën në qendër për Halilin, por ky i fundit nuk e prek. Sfera shkon te Sentamu që me portën bosh gjuan, por çuditërisht jashtë. Pjesa e parë mbyllet e bardhë 0-0.
Pjesa e dytë nis me një rast të madh ku është Sentamu që në minutën e 46-të rreh shtyllën. Pesë minuta më vonë, Batha provon me kokë, pret Abibi pa problem. Provon edhe Torasa, por nuk ka rezultat. Flamurtari futet në ujë, ndërsa Tirana merr kontrollin e lojës dhe në
minutën e 53-të, Turtulli ka një tjetër shans të madh. Mbrojtësi provon shumë pranë zonës të gjejë rrugën e rrjetës, por topi është ndalur në fytyrën e portierit Koliçi. Më pas preket me dorë nga Alla, për gjyqtarin gjithçka e rregullt. Dhe në momentin kur të gjithë mendonin
se ndeshja do të mbyllej në barazim, vjen kryevepra e Edon Hasanit, i cili 120 sekonda nga fundi zhbllokon sfidën. Pas një lëvizjeje mjeshtërore në zonë, futbollisti shkodran lëshon një predhë, duke ndëshkuar portierin Koliçi. 1-0 dhe Tirana në festë. Daja nuk u beson
syve. Edhe pse mundohet të bëjë dy lëvizje, këtë herë Tirana e Mema i japin një shuplakë në frymën e fundit. Një trepikësh që qetëson shpirtrat bardheblu deri në janar, por që komplekson ambientin në Vlorë, i trazuar nga mungesa e parave...