Ish-trajneri i korçarëve parashikoi humbjen në Kamzë

Shkëlqim Muça godet sërish për Skënderbeun. Parashikimi i tij se korçarët do të humbisnin edhe ndaj Kamzës rezultoi i saktë. Pas dështimit në shtëpi ndaj Luftëtarit, me shifrat 2-3, ish-trajneri i Skënderbeut e cilësoi të vështirë situatën e korçarëve këtë sezon. Duke komentuar çiftet e kësaj jave, Muça u shpreh se dy janë ndeshjet më të "sigurta": fitorja e Kukësit me Kastriotin dhe ajo e Kamzës ndaj Skënderbeut. "Kukësi mund Kastriotin dhe Kamza fiton ndaj Skënderbeut, më duken të sigurta", pati thënë Muça dhe dje ashtu ndodhi në Kamzë, ndërkohë që mbetet për t'u parë se çfarë do të rezervojë takimi mes Kukësit dhe Kastriotit nesër në "Elbasan Arena". Ishtrajneri kampion me Tiranën dhe Dinamon nuk u ndal me kaq, pasi bëri parashikuesin edhe të ndeshjeve të tjera të dielën e kaluar. "Fiton Tirana, barazim i Partizanit dhe fitore e Teutës", u shpreh Muça, duke i rënë në kokë parashikimit edhe për bardheblutë, që dje ia dolën ndaj Flamurtarit. Ndërkohë, kur është pyetur nëse shqetësohej se mos presidenti i Skënderbeut, Ardjan Takaj, e konsideronte sërish "fallxhor", duke iu referuar deklaratës së kreu të klubit në "Panorama Sport", Muça dha këtë përgjigje: "Secili ka mendimin e tij. Unë jam këtu për të dhënë një mendim dhe thjesht po them që Kamza fiton javën e ardhshme. Pjesa tjetër nuk më intereson". Pak ditë më parë, trajneri i shquar pohoi se me ecurinë që ka deri tani Skënderbeu rrezikon të prishë kampionatin. Kjo deklaratë nuk i pëlqeu presidentit Takajt, i cili në reagimin për gazetën tha se Muça ishte bërë si fallxhor dhe shumë shpejt deklaratave të tij do t'u dilte tymi. Ndërkohë, edhe te Partizani duhet të "dridhen", sepse ish-trajneri nuk parashikon triumf të tyre.