Kapiteni Lika: Kemi bërë gabime, me Veleçikun ta bëjmë festë
Kapiteni i ekipit të Vllaznisë, Gilman Lika, është shprehur i kënaqur me ecurinë e deritanishme të ekipit shkodran. Sipas tij, skuadra, sidomos në këtë fazë të dytë, nuk duhet që të kishte bërë asnjë gabim. Të tillë e quan ai frenimin ndaj Besëlidhjes. Gjithsesi, ai e vlerëson me notë pozitive ecurinë e deritanishme. "Sigurisht që do të donim që të mos kishim asnjë gabim në ecurinë tonë, por janë gjëra që ndodhin. E pësuam edhe ndaj Besëlidhjes në fund kur nuk e meritonim dhe ndoshta kompensuam atë fitore të minutave të fundit ndaj Korabit. Ecuria jonë e përgjithshme deri tani ka qenë pozitive dhe e rëndësishme është që ta mbajmë sa më gjatë atë për të ruajtur vendin e parë deri në fund. Sa për dënimin e fushës së Erzenit, nuk mendoj se duhet ta mbajmë mendjen aty. Ne i respektojmë të gjithë kundërshtarët, si Erzenin, ashtu edhe Dinamon apo dhe Veleçikun", u shpreh kapiteni.
Veleçiku - Vllaznia do të luajë sot në transfertë takimin me Veleçikun, por për këtë përballje e para do të jenë të favorizuar, pasi do ta luajnë në fushën e stërvitjes së saj "Reshit Rusi", por gjithsesi për Likën asgjë nuk shikohet e lehtë. "Është ndeshja e fundit e këtij viti dhe pa dyshim që do të tentojmë ta fitojmë, në mënyrë që edhe festat e fundvitit t'i shijojmë ashtu si duhet. Përballë do kemi një skuadër shumë të motivuar si Veleçiku, e cila ka bërë mirë deri tani në kampionat dhe ka edhe ajo objektivat e veta për të qenë në pesëshen e parë, megjithatë ne na duhen pikët dhe jam i bindur se do ia dalim. Skuadra është e plotë, formacioni thuajse është stabilizuar tashmë sepse e njohim edhe më mirë lojën e njëri-tjetrit dhe kësisoj besoj se do t'ia dalim me sukses, ndonëse luajmë në një fushë jo shumë të përshtatshme dhe që na pengon në lojën tonë", vijon ai.
Forma - Ndërsa, në fund të fjalës së tij, kapiteni kuqeblu Gilman Lika, i pyetur në lidhje me formën e tij sportive, është shprehur: "Ju që na shihni nga jashtë apo dhe specialistët mund të japin një mendim më të drejtë, por besoj se gëzoj një formë të mirë dhe shpresoj të bëj më të mirën që Vllaznia të arrijë objektivin e saj për t'u ngjitur në Superiore", përfundoi Gilman Lika.