Krishtlindje në majën e tabelës, Liverpuli shpreson te... tradita
Salah e udhëheq drejt fitores, ja rastësia që bën me krahë tifozët
Do të jenë Krishtlindje të qeta për tifozët e Liverpulit, të cilët do t'i shohin nga lart të gjitha skuadrat e tjera të Premier Ligës, ashtu si ylli në majën e pemës së Krishtlindjeve. Në atmosferën elektrizuese të "Molineux" ku tifozllëkut iu bashkuan edhe reshjet e shiut, Mohamed Salah bën ligjin. Një gol dhe një asist për egjiptianin, i cili udhëheq Liverpulin drejt triumfit në transfertën me Uolvesin dhe i çon diferencat plus katër nga Mançester Siti. Këta të fundit do të luajnë sot kundër Kristal Palas. Tani Liverpulit i duhet që të vazhdojë traditën e Premier Ligës, pasi 4 skuadrat e fundit që e kanë mbyllur në vendin e parë në datën 25 dhjetor fitojnë kampionatin. Por, kujdes, këtë traditë e ka prishur Liverpuli në vitin 2013 ku e humbi kreun.
GOL ME VUAJTJE- Siç ishte parashikuar. Të kuqtë dominojnë në zotërimin e topit që nga fillimi i ndeshjes. Por, vendësit dalin rrezikshëm në sulm me pak pasime dhe vënë në provë Alisonon tri herë. Traore dhe Zais provojnë,
por nuk ia dalin të ndëshkojnë brazilianin. Rasti më i mirë i ndeshjes vjen në minutën e 18-të, kur Salah ndëshkon Uolvesin pas një asisti të Fabinjos, duke shtangur mbrojtjen dhe portierin Rui Patrisio. Me këtë gol, Salah merr kreun e golashënuesve me 11 të tillë. Por, ai dha edhe asistin për golin e dytë duke u bërë lojtari i parë në
Premier Ligë që ka shënuar dhe ka asistuar në ndeshje të ndryshme. Në fundin e pjesës së parë, djemtë e Nunjo Espirito Santos e mbyllin në sulm me tentativat e Xhonit dhe Doherti.
HERA E PARË- Dhjetë minuta nga fillimi i pjesës së dytë Nabi Keita dëmtohet dhe largohet nga fusha për t'i lënë vendin Lalanës. Pikërisht ky i fundit mund të kishte dyfishuar rezultatin, por nuk e mbylli siç duhet një kundërsulm të SalahMane. Rui Patrisio e mbyll dhe i dhuron goditje këndi Liverpulit. Ishte çështje sekondash, sepse Van Dajk shënon pasi merr një pasim perfekt nga Salah. Për mbrojtësin holandez ishte goli i parë në Premier Ligë këtë sezon dhe shërbeu për t'i dhënë qetësi skuadrës së tij. Një fitore që u jep moral "reds"-ave në prag të festave dhe përpara turit të forcës nga 26 dhjetor në 3 janar, kur do të luajnë 3 ndeshje me Njukasëllin, Arsenalin dhe Sitin. Deri në përballjen me këta të fundit shpresojnë që të kenë këtë diferencë.