Pogradeci e kthen në stërvitje, Turbina bie që në... start
Fetollari: Na duhen sulmues për të synuar kreun
Pas rezultateve të munguara, liqenorët arrijnë të marrin një trepikësh në takimin e fundit për këtë vit. Ata e kishin vlerësuar shumë këtë ndeshje dhe dhanë më të mirën e tyre në fushë, edhe pse kishin disa mungesa të rëndësishme. Ndërsa, Turbina nuk ka arritur të tregojë se di të ruajë stabilitetin. Epërsia e pogradecarëve ka qenë e dukshme dhe miqtë kanë mundur të shfaqen vetëm në pjesën e dytë, kur jo vetëm shënuan, por kanë qenë edhe më kërkues. NDESHJA Takimi ka filluar me epërsi të dukshme të vendësve, të cilët që në minutat e para kanë pasur një rast për shënim. Në të 5-ën, Alillari që debutonte sot si titullar, në hyrje të zonës kalon disa mbrojtës dhe në pozicion të prirët gjuan e tund rrjetën kundërshtare. Në të 15-ën, sërish Alillari përfiton pas një topi nga goditja këndore, mbrojtësit kundërshtarë largojnë, por Alillari gjendet në vendin e duhur dhe dyfishon për të tijtë, ndërkohë që Turbina nuk kishte forcë për të reaguar. Cërrikasit afrohen dy herë te porta e Malit, por pa rrezikuar. Golin e tretë për pogradecarët e shënon Jahaj. Më pas, ai shfaqet sërish nga një goditje standarde, duke treguar se janë specialitet i tij. Në minutën e parë të shtesës së kësaj pjese të parë vjen edhe i katërti gol për vendësit, që me anë të Topllarit shënojnë nga pika e bardhë e penalltisë. Pjesa e dytë nuk ka pasur bukurinë e të parës. Vendësit tashmë e kishin siguruar fitoren dhe nuk shpenzuan shumë energji, ndërsa miqtë kanë qenë kërkues dhe kanë arritur të shkurtojnë diferencën e golave në të 65-ën. Pas një aksioni individual, Sosoguni arrin të shënojë në portën e Malit. Në të 74-ën është përgjigjur Topllari me një gol spektakolar për të tijtë. Ky gol ka vulosur krejt takimin që përfundoi 5-1 për pogradecarët. FESTIM FETOLLARI Në përfundim të takimit, trajneri i Pogradecit komentoi edhe situatën e skuadrës dhe nevojën për merkato: Jam i kënaqur nga ajo çfarë arritëm duke marrë tri pikët. Kjo na jep mundësinë të jemi aty ku synojmë. Megjithatë, loja në pjesën e dytë nuk ishte si në 45 minutat e para. Tani ne duhet të mendojmë për merkaton, pasi jemi në luftën për kreun. Na duhen tri përforcime në mesfushë, por më shumë në sulm", tha Fetollari.