Mema: Lika e Karabeci të rëndësishëm, por...
“Bardheblutë duan lojtarë që të bëjnë diferencën në fushë”
Ardian Mema është gati për sfidën e radhës, atë të fazës së tretë për të ngritur Tiranën në vendet ku i takon. Pas sfidës me Flamurtarin, Mema foli gjatë për “Panorama Sport”. Ai sqaroi se çfarë do të kishte bërë në qoftë se Tirana nuk do të fitonte me Flamurtarin me ato 7-8 raste të vërteta për gol, që të para në televizor të heqin mendjen. Mema pranoi se ndoshta ajo fjalë e presidentit Halili për donatorët e tij e motivoi ekipin. Grupi, pas këtij viti pret një donator i ri. “Donatori? Kjo e ndryshon goxha klimën, por që futbollistët ato cilësi fizike, ato cilësi tekniko-taktike kanë. Nuk është se ndryshon gjë. Megjithatë, nëse do të ketë ndryshime nga ana psikologjike, kjo mbetet për t’u parë”, shtoi Mema. Trajneri para ndeshjes donte dy dhurata për Vitin e Ri. Njëra iu plotësua, pra, të mundte Flamurtarin, Idrizin dhe Dajën. Tani ai pret dhuratën e dytë. “Të them të drejtën, Tirana realisht ka nevojë për lojtarë që të bëjnë diferencën, i kam parë disa futbollistë, por që do t’i zgjedhim. Duhet të ndërhyjmë, por duhet ta bëjmë me kujdes”, deklaroi trajneri i bardhebluve. Mema zbuloi se në njëfarë mënyre fitorja e Kamzës vuri në presion ambientin bardheblu, që e shihte veten në fund të tabelës, pikërisht në vendin e nëntë të Superiores. “Kamza? Secili i bën hyzmetin ndeshjes së vet. Kundërshtari atë punë ka, do të fitojë trepikëshin. Mendoj se kampionati po bëhet shumë i fortë e sidomos në fazën e tretë e të katërt. Ne duhet të kalojmë nga zona e ftohtë, sepse nuk mund të rrimë këtu kur ekipi luan mirë”, pranoi me qetësi trajneri i Tiranës, i cili kërkon një pikënisje tjetër për Vitit të Ri. “Duam të jemi ndryshe vitin tjetër. Shpresoj të jetë kështu, sepse është shumë e rëndësishme që të jetë një pikënisje”, tha Mema. Në stol ndaj Flamurtarit ishin disa lojtarë titullarë, si Lika, Karabeci apo edhe Daja. A janë në planet e Memës këta futbollistë? “Unë po them diçka, unë e kam filluar sportin dhe e kam mbaruar, secili ka atë ciklin e vet. Çdo lojtar te Tirana është shumë i rëndësishëm, qoftë Karabeci, qoftë Lika apo dikush tjetër. Ata do të jenë pjesë e ekipit sepse kemi nevojë për ta, por do të luajë ai që është më i gatshëm dhe ai që mendoj unë se është në formë”, mbylli Ardian Mema.