Lushnja-Apolonia, bardhësi me “silenciator”
Vendësit ankohen për ndalesat e lojës, fierakët pikë çlirimi
Lushnja dhe Apolonia e mbyllin vitin në... bardhësi. Në një stadium të boshatisur prej mungesës së tifozëve të dënuar, një terreni në kushte të rënduara dhe me një gjykim ku kontestimet ishin të vazhdueshme, ky 90-minutësh nuk pati fitues. Edhe pse derbi i Myzeqesë kurdoherë ka prodhuar interes, entuziazëm, por edhe gola, për të parën herë pas 20 vitesh mbyllet në shifrat 0-0. Një rezultat që u shkon për shtat ndoshta më shumë fierakëve, që kishin nevojë për frymëmarrje pas asaj humbjeje që pësuan në shtëpi me Elbasanin. Maringlen Kule debuton me pikë në transfertë, ndonëse e mbyllën 2018-ën në pesëshen e dytë dhe jashtë objektivave fillestare. Nga ana tjetër, Lushnja lë dy pikë të çmuara në shtëpi, por mbetet në pesëshen e parë me 3 pikë më shumë se Orikumi i vendit të gjashtë.
PJESA E PARË - Ndeshja nis në ekuilibër të plotë, por me Lushnjën që shfaqet disi më kërkuese. Ata përpiqen që të fitojnë, por u mungojnë rastet e pastra. Gjithsesi, pas të 30-ës nis “beteja” e vërtetë për vendësit. Porsa gjejnë hapësirën e parë, ata shtojnë ritmin dhe presingun dhe hidhen në kërkim të golit të avantazhit. Kalojnë me shumë lehtësi mesfushën, duke krijuar panik konstant në zonën e miqve. Në të 36-ën, Ervis Gjyla i “mashtron” të gjithë me pasimin tokazi drejt Griseld Dervishit, por kjo goditje pritet nga portieri Harizaj. Në të 42ën, Alushi pason nga e djathta drejt qendrës ku gjendjet Gjyla, ky i fundit rrotullohet dhe gjuan, por portieri i Apolonisë falë reflekseve devijon me dorën e djathtë. Një minutë para pushimit, Baze provon që të zhbllokojë rezultatin me kokë, por topi nuk e kalon vijën.
PJESA E DYTË - Me shifrat e ndalura në 0-0, skuadrat rikthehen në fushë. Trajnerët u besojnë formacioneve të njëjta dhe për pasojë në fushë zbresin titullarët. Luhet i njëjti “skenar” i 15 minutave të fundit të pjesës së parë. Që në start Gjyla dhe Sefa kombinojnë bukur, por goditja e kapitenit devijohet me zgjuarsi nga Nako. Apolonia shfaqet për herë të parë e rrezikshme në minutën e 50-të me një gjuajtje të Hysenshahajt, por topi i devijuar kalon pranë shtyllës së majtë të Bejtes. Në të 59-ën, të besuarit e Ilir Gjylës ndërtojnë një aksion model, por Alushi e përfundon me një gjuajtje nga e djathta duke gjetur rrjetën e jashtme. Pasqyrën e portës nuk e gjen as kapiteni Sefa në të 74-ën. Ademi kroson nga e djathta dhe Sefa në gjysmë kthesë e dërgon topin jashtë kuadratit. Në 15 minutat e fundit ndeshja bëhet e bezdisshme nga bilbili pa “doganë” i kryesorit Halo. Me ndërprerjet e shumta, loja bëhet “mbetëse” në mesfushë. Përfundon me kaq. Nga një pikë për skuadrat myzeqare, që barazojnë pa gola në “Roza Haxhiu”.