Inter, mungon karakteri dhe një si Modriç
Kalendari dukej se ishte zgjedhur me dorë për t'u dhuruar tifozëve të Interit një Krishtlindje të qetë pas zhgënjimeve të shumta në këtë moment të sezonit. Por, ja që ndodh e kundërta. Kievo e vogël ishte hapi i parë blof i pushimeve në "Bentegodi", Interi përjetoi edhe një herë psikodramën e këtij sezoni, duke i dhuruar Pelisierit barazimin në minutën e 91-të. Hedh në kosh 2 pikë, të cilat do t'i kishin shërbyer për t'u larguar nga Milani dhe Roma në garën për Ligën e Kampioneve. Por, kur gjithçka dukej se kishte arritur pikën më të ulët (pas eliminimit me PSVnë), ja një tjetër ndeshje që tregon limitet e një skuadre. Etiketimi anti-Juventus që mori në verë, dalëngadalë filloi të grisej dhe tani krahasimet që bëhen janë gjithmonë e më shumë të pakta. Dhe dhimbja bëhet më e madhe në ditën kur Luka Modriç, i cili ishte ëndrra e madhe e verës për zikaltrit, udhëhoqi Realin e Madridit në finalen e Botërorit për të "pushtuar" botën. Ky Inter duket se nuk ka karakter dhe shumë pak organizim. I mungon pikërisht një kampion si kalibri i kroatit. Si Marota, ashtu edhe Spaleti thanë se në merkaton e janarit nuk do të ketë ndonjë goditje të madhe, një politikë që tregon se skuadrat e tjera nuk kanë ndërmend t'i largojnë kampionët e tyre dhe është e vështirë të gjesh dikë që të sjellë kualitet. Është e vërtetë që zikaltrit paguajnë shtrenjtë edhe "faturën" e gabimeve në mbrojtje. De Vraj gaboi kundër Kievos, ndërsa Azamoah i "tradhtoi" zikaltrit me Juven dhe PSV-në. Ndaj Romës ishte Brozoviç që shkaktoi penallti. Por, fakti që kësaj skuadre i mungon grinta dhe kualiteti shihet nga të gjithë. Shtatë fitoret radhazi krijuan një iluzion, por tani janë rikthyer sërish problemet. Ashtu siç ndodhi në kohën e Mançinit Pioli, tani edhe Spaleti. Askush nuk shpëton. Por, pavarësisht momentit, Interi duhet të jetë patjetër në Ligën e Kampioneve në sezonin e ardhshëm. Kjo është detyra parësore, ndërsa Marota nuk humbet kohë dhe po studion mënyrën sesi mund të arrijë nivelin e Juventusit. Fillimisht duhet të vendosë duart në portofol dhe të bëjë afrime të rëndësishme për të forcuar skuadrën. Lajmet më të mira për interistët erdhën nga pragndeshja, ku Marota tha se do të kërkojë të sjellë lojtarë kampionë për të bërë hapin cilësor. Një si Modriç, që sjell ekuilibër dhe rregull. Diçka që i mungon këtij Interi "të çmendur".